Ua toe tolopoina nei le mata’upu o le tagi a le vaega fa’aupufai a le Fa’atuatua i le Atua Samoa ua Tasi (FAST) lea e fa’asaga i le Ofisa o Faigapalota (OEC) ma le Afioga i le Tama’ita’i Faipule fa’aopoopo o le Palemene ia Aliimalemanu Alofa Tu’u’au se’ia aulia le Aso Lulu o le vaiaso nei.
O lenei mata’upu e pei ona finauina, o loo te’ena ai le fa’ai’uga e pei ona faia e le Ofisa o Faigapalota, e avea ai Aliimalemanu ma sui fa’aopoopo o le Palemene o Samoa, ona o le mau a le OEC, e lei atoa le 10% faatapulaaina o faipule tamaitai.
O le aoauli nei na toe fofogaina ai lenei mata’upu ona o le avanoa sa tu’uina atu i tama’ita’i loia a le FAST ia Mauga Precious Chang ma Muriel Lui e failaina ai nisi vaega faaopoopo o le lā talosaga.
Sa tu’uina atu i luma o le Faamasinoga se talosaga fa’aopoopo a le FAST e tauala atu i tama’ita’i loia; ina ia avea le Alii Faipule o Alataua Sisifo ia Seuula Ioane, e fai ma Itu Tagi faaopoopo o lenei mata’upu.
O Seuula Ioane lea sa manumalo mai i le faigapalota a Alataua Sisifo e pei ona faamaonia mai e le faaiuga aloaia, e 695 palota a Seuula Ioane i le 464 o palota a Aliimalemanu. E maua e Aliimalemanu le 40% o le aofai o palota.
Sa fesiligia e le Afioga i le Sui Fa’amasino Sili ia Mata Tuatagaloa, faapea Lesatele Rapi Vaai ia tamaitai loia a le FAST, poo le ā ni itu o loo aafia ai le Faipule. Sa fesiligia poo leā se afaina o le nofoa o le Itumalo o Alataua Sisifo, pe afai ae fa’aaogaina le faaiuga e avea Aliimalemanu ma faipule fa’aopoopo o le Maota.
Na tali le tama’ita’i loia ia Muriel, e leai se afaina ae ona o Seuula Ioane sa filifilia e le Itumalo, ma e tatau ona ia finauina fa’atasi le avea ai o Aliimalemanu ma faipule fa’aopoopo e fua i luga o le tulafono o le Fa’avae i lona Vaega 44 (1A).
Ua tuuina atu e le Faamasinoga le avanoa i le itu a le OEC e tali mai ai i lenei vaega o le talosaga.
Sa fofogaina foi i le asõ le talosaga a le Ofisa o le Faigapalota e tauala mai i le latou loia ia Fuimaono Sefo Ainu’u; ina ia fa’aleaogaina atoa lenei mata’upu (strike out motion) ona o le latou mau, o lo’o fa’atulafonoina le tofiaina o Aliimalemanu Alofa Tuuau e avea ma faipule fa’aopoopo o le Palemene o Samoa.
O lenei mau o loo matuai teena e le Itu a le vaega faaupufai a le FAST.
O le iuga o taualumaga o le Faamasinoga i le aso, sa tuuina mai ai e le Faamasinoga le poloaiga i alii ma tamaitai loia; ina ia oo atu i le itula e 3 i le aoauli taeao (Aso Lua), ua mae’a ona tuuina atu a latou tali i mata’upu uma e pei ona fofogoina i luma o le Faamasinoga i le asõ.
O le Aso Lulu i le itula e 12 o le a toe fa’aauauina ai taualumaga o lenei mata’upu e pei ona iai talosaga faaopoopo a Itu uma e lua.
E pei ona silafia e le mamalu o le atunuu, o lenei faaiuga sa tuuina mai e le Ofisa o Faigapalota i luga o le latou Facebook i le po o le Aso Lua 20 Aperila, I le maea ai o le 4 aso talu ona faalauiloa aloaia le faaiuga o faigapalota (official results).
O lenei foi faaiuga, e suia ai le fainumera o le faaiuga o le Faigapalota i le 26 o sui faipule a le HRPP, ma le 26 o sui faipule a le FAST ina ua filifilia e Tuala Tevaga Iosefo Ponifasio le vaega faaupufai a le FAST.
O lenei foi lava mataupu ua tuuina mai ai se Pepa o Faamatalaga e sainia e le Faamasino Sili o le Faamasinoga o Samoa, le Afioga ia Satiu Simativa Perese e faamanatu mai ai i le mamalu o le atunuu, o le Faamasinoga, o loo nafa ma le puipuiga o le Faavae o Samoa ma ana Tulafono…
Tusi a le Faamasino Sili:
“Ua laga se leo ona e le o po se lilo i le mamalu o le atunuu, e le o se taimi faigofie lenei i taualumaga o le Malo, aemaise le nofo filemu ma le mautinoa o le tatou Atunuu. Ae ou te faamanatu atu ma le fa’aaloalo tele, o le Faamasinoga o Samoa, o se itu o le Tafatolu o Itu Faafetauagai o le Malo (Arms of Government), e nafa ma le puipuiga o le Faavae o Samoa ma ana Tulafono. O Alii ma Tamaitai Faamasino, ua maea ona faatautoina e faatino le latou galuega ma le amiotonu mo tagata uma, e aunoa ma le fefe po’o le faapito, alofa po’o le loto tiga..
‘Ia iai pea le faatuatuaga o Samoa i lana Faamasinoga totofi..
“Tatou tatalo e maua pea le manuia ma le filemu o le tatou atunuu.
Sainia
FAAMASINO SILI O LE FAAMASINOGA SILI O SAMOA
- Hearing Date Set for Four People Charged with Sexual Acts on Woman with a Disability - October 5, 2021
- Two Sasina Matai Charged with Uttering Threatening and Insulting Words - October 5, 2021
- Male Prisoner at Tanumalala Pleads Guilty to Acts of Sodomy - October 5, 2021
