Ua talosagaina e le Komisina o Leoleo soo se tasi, poo ai lava na te silafia se faamatalaga e uiga i le maliu o le tamaitai pule o le TV3, faamolemole agai atu i le Matagaluega o Leoleo e faailoa iai.
O le taeao o le Aso Gafua o le vaiaso nei na maua ai se tala faanoanoa ina ua maua atu le tino maliu o le tamaitai ia Aotearoa Pesamino Myers i lona maota i Ululoloa.
I se faatalatalanoaga ma le Alii Komesina o le Matagaluega o Loleo ma Falepuipui, le susuga Auapaau Logoitino Filipo i le afiafi o le Aso Lulu 25 Ianuari, na ia saunoa ai, o le taimi nei o loo faagasolo suesuega a leoleo, ae lē o iai se isi ua molia.
E ui ina tele faamatalaga i tua e uiga i lenei mataupu, ae o loo saunoa manino le Komesina o Leoleo, e lē o iai ni manuaga i le tino o le tamaitai ua maliu nei.
Peitai e pei ona tā’ua e le Komesina, “Ua iai nisi na auina atu i totonu o le ofisa e fesiligia, ma suesueina.”
“E tatalo atu i soo se tasi lava o ia silafia se faamatalaga, faamolemole agai mai e faailoa mai, e malu lava puipuiga i faamatalaga..
“Soo se mea lava, e faalilolilo vaega uma, ae manaomia lou faasoa mai e fesoasoani I suesuega le matagaluega.”
Ua tatalo mai foi le Komesina, faamolemole aua nei faia ni faamatalaga lē sa’o e ono taitai sese ai le faafofogaaga a le atunuu, ae se taimi ona maua mai lea o se tala manino e tusa ma sailiiliga le matagaluega.
O le amataga o le vaiaso nei na maua ai se Tala faanoanoa ina ua maua atu le tino maliu o le tamaitai ia Aotearoa i totonu o lona maota i Ululoloa.
Ua tuuina mai ai ma se feau faamaise mai le Komesina i aiga ma uo loto faanoanoa ona o le motusia ai o le mafutaga ma le tamaitai poo le afioga Aotearoa Pesamino Myers, o lē sa galue i ofisa faasalalau i Samoa talu mai le 2015.
“Tau ina ia faamaise atu le Agaga o Le Atua i aiga ma uo loto faavauvau.”
