Talosagaina e Vaa-o-Fonoti se latou “Avamua” e sui ai le Talomua

21 Ianuari 2021 Palemene o Samoa. I le fonotaga a le Palemene o loo usuia i lenei vaiaso, o loo sau saunoa ai sui mamalu o le Maota Fono i Tiafau i le faaleoina lea o manaoga a itumalo taitasi.

Sa tulai le sui faipule o le Vaa-o-Fonoti le afioga ia Ma’uu Siaosi Puepuemai e talosagaina se Ava Mua e sui ai le Talo Mua mo lona itumalo.

“Ou te faamauina le agaga faafetai i lau afioga i le minisita o Faatoaga i fuafuaga ua faataatitia nei mo le manuia o le atunuu, ae o lea ua maitauina le tulaga manaia o le faatinoga o le polokalame o le Talo Mua i afioaga taitasi, peitai, o le matou itumalo o Vaa-o-Fonoti e lē gafatia ai se Talo Mua..”

Sa saunoa Ma’uu ma o ia foi o se faipisinisi iloga i Samoa, e faamatala le mafuaaga o lana talosaga.

“O eleele a lo matou itumalo, e tua maota ma tua laoa i mauga, ae papa foi, e laititi lava se vaega e mafai ona faia ai ni faatoaga, ae na’o le ava o loo gafatia ma malosi ai lo matou itumalo..

“O le talosaga la lau afioga, ae ā pe ā fai se Ava Mua a le matou itumalo? Ua tele ituaiga ava, e maua uma lava i Fagaloa”.

Sa talosagaina foi e le sui faipule a Vaa-o-Fonoti le faatulagaina o ni maketi mo mea taulima

“Lona lua o talosaga a lenei itumalo, tau ala atu i lau afioga i le Minisita o Faatoaga – o mea taulima. O le matou itumalo e numera tasi i le toatele o i latou e faia ma gaosia soo se mea taulima..

“Faamolemole lau afioga, pe le maua se maketi i atunuu i fafo e tuuina atu ai mea taulima..

“O talosaga ia a lenei itumalo. Ae ae tau lava ina taatia atu i ou tafatafa se vaivai o lenei sui”.

O le afioga ia Ma’uu o se tamalii faipisinisi, ua silia ma le 20 tausaga lana tautua e ala i le fale pizza. O loo ia umia foi se pisinisi o taavale rental ma o ia foi o se faifaatoaga mo le totoina o le ava Samoa.

O le uluai taimi lea ua avea ai o ia ma faipule o lona itumalo ina ua manumalo i le palota tele ia Aperila 2021.

(6)