Ua tuuina atu nei i luma o le Faamasinoga Maualuga se talosaga a Sui Faipule e toatolu lea na faamavae mai i le vaega faaupufai o le HRPP, e toe teuteuina ai a latou faamatalaga tusia, ae lei amataina taualumaga o le faamasinoga e suesueina ai pe ono toe foi i faigapalota laiti, pe leai.
O le susuga i le tamaitai loia ia Muriel Lui na tulai e faaleo lenei talosaga mo le afioga ia Ale Vena Ale o le itumalo o Faleata 4, le tofa ia Tu’uu Anasii Leota o le itumalo o Siumu, faapea le afioga ia Mauu Siaosi Puepuemai o le itumalo o Vaa o Fonoti. sa ia faaleoina lenei talosaga i luma o lana afioga i le Faamasino, Leiataualesa Daryl Clarke.
Sa faaalia e Muriel Lui, ua toe fia teuteu faamatalaga a Sui Faipule, ina ia aveesea ai nisi i itu o loo aafia ai le vaega faaupufai o le HRPP, lea ua fai lo latou itu i le faamasinoga, e tali atu ai i tuuaiga na saunoa iai Sui Faipule.
I le tali mai o le Faamasinoga, sa faatulaga mai ai e le afioga ia Leiataualesa Daryl Clarke le Aso 5 Iulai, e faatino ai se iloiloga ua faaigoaina o le JSC (Judiciary Settlement Conference) e iloiloina ai le talosaga a Alii Faipule e pei ona tauala mai lo latou loia.
O le suesueina la o le mataupu autu – ua toe tolopoina ai nei se ia mae’a se faaiuga a le JSC.
O lenei mataupu na tuuina atu e le Fofoga Fetalai le afioga ia Papalii Lio Taeu Oloipola Masepa’u i luma o le Faamasinoga Maualuga mo sana faaiuga. O le tulafono Faavae o Samoa (Constitution), o loo faapea mai ai, a fesiligia se tulaga o se tofi faipule i totonu o le Palemene, e na o le Faamasinoga Maualuga e na te mafai ona iloiloina ma aumai ai se tali.
O ni aiaiga o le tulafono o faigapalota sa pasia i le amataga o le 2021, lea o loo faapea mai ai, afai e tuua e se Sui Faipule le vaega faaupufai na auala pe resitala mai ai mo le faigapalota, e tatau ona toe foi e faatino le faiga palota aua ua avanoa le nofoa le itumalo. Sa masani ona faatagaina le tuua o se Sui Faipule o lana vaega faaupufai, ma se’e ane e fai ma Sui Faipule tutoatasi, peitai, o ni teuteuga sa pasia i le 2021, lea o loo finauina nei.
O le mau a Sui Faipule, ua taotaomia e ia vaega fou o le Tulafono o Faigapalota, o latou aia tatau, e tulai ese ai ma se vaega faaupufai ua latou le toe talitonuina.
I totonu lava o tusi faamavae a Ale Vena Ale faapea Tuuu Anasii Leota, o loo tele ai ni tuuaiga e faasaga i le pulega lelei (governance) o le HRPP. Sa faaleo foi e Tuuu Anasii i totonu o le Palemene nisi o nei tuuaiga e faasaga ia Tuilaepa, le taitai o le vaega faaupufai.
