O loo tumau pea le finau a Alii ma Faipule o Levi Saleimoa e fia saili le pule o fanua o loo feteenai ai ma le afioaga o Afega.
I se faatalanoaga ma le vasega o tusitala i Samoa sa tuuina mai ai se finagalo o Alii ma Faipule o Levi, o loo ua maea ona faila le latou Apili i le Faamasinoga o Fanua ma Suafa, e toe saili ai le pule o fanua o loo finauina nei.
O le maea o le fonotaga faa le masina a le afioaga o Levi i le aso ananafi, Aso Gafua 6 Novema, na faalauiloa ai e le tootoo o le afioaga, le tofa iā Umu Pati Muaau, o le fofoga alo o Malietoa, faapea le afifio o aiga Sa Tilialo, le mamalu o le Gauta’ala ma le faletolu ma le fetalaiga ia Luatua e faapea, “Ua tasi le afioaga nei o le a saili le pule o fanua o loo finau mai ai Afega, ae o le matou mau, o eleele lava o Levi..”
“O le 1890 o loo faamauina na tāina ai le togavao poo le vaomatua, ma o loo iai faamauamauga a Siamani, o eleele lava o Levi.”
O le mau a Levi Saleimoa o loo ua tuuina mai i le saunoaga faalauiloa a Umu, sa iai se suega tuaoi na faia i le tausaga 1911.
“E le mafai ona suia le matou mau, e lē o iai se feagaiga na faia ma Fata ma Maulolo.. ae o le 1911, na faatulaga ai loa tuaoi, ma e fa lava tulimanu poo corners o lena tuaoi e aofia ai Lotonoa, Alia Laumasa ma Levi.
Saunoa Umu i le latou mau, na faasalalauina i le 1911 nei tuaoi i le Savali, ae lei iai le afioaga o Afega ona ua maea ona tuuina atu le fanua ia Levi.
“O le eleele lea o Laumasa, e 54 eka. O Laumasa na aafia i le 723 eka a Fata ma Maulolo. Ona totogi mai lea e Fata ma Maulolo o ia eleele agai i Alii ma Faipule o Levi, ma o loo iai lava faamaumauga o matou finauga.”
O eleele o loo tulai mai ai finauga i afioaga e lua ua ma’ea ona taoto faaiuga a le Faamasinoga o Fanua ma Suafa e tusa ai ma se faamalamalamaga na tuuina mai e le Peresitene o Fanua ma Suafa e tauala mai i le Ofisa Sili o le Matagaluega poo le Resitara o Faamasinoga iā Papalii John Afele Taimalelagi.
I lena feiloaiga ia Oketopa, sa faailoa ai e le Resitara ia Papalii John faamaumauga ma faaiuga o le Faamasinoga o Fanua ma Suafa.
“O le 723 eka o eleele na foai e Fata ma Maulolo mo Leauvaa, ao tua atu o le 723 eka, o eleele ia e pulea e Fata ma Maulolo.”
Sa saunoa ai foi le Resitara o le Faamasinoga i lea feiloaiga, e lei iai se talosaga apili a Levi Saleimoa ua faaoo atu i le Ofisa i lena taimi.
Na tulai mai nei feteenaiga ina ua agai atu Afega e sua le auala, e faato’a ma faatino ai atiinae tau faatoaga mo le afioaga i nei fanua.
Talu mai le feiloaiga ma le tali mai o le Faamasinoga o Fanua ma Suafa i le Aso 16 o Oketopa, o loo faagasolo pea le galuega a le afioaga e sua ai le auala ma tapena le fanua aua atinae o sui o le afioaga.
O faamaumauga a le Faamasinoga o Fanua ma Suafa, o le 1963 o loo māua ai na teena ai se talosaga apili a le afioaga o Tuanai. E lei iai se talosaga poo se itu a le afioaga o Levi i le faamasinoga lena o le 1963.
E ui ina taoto faaiuga a le Faamasinoga o Fanua ma Suafa o eleele e pulea e Fata ma Maulolo, peitai, o loo maualuga pea le taofi ia Umu ma le afioaga o Levi, o eleele o loo finau ai nei, o eleele mai tofiga a Malietoa i lana fanau o le faleono Leatigaga.
I le feiloaiga a le vasega o Tusitala ma le afioga o Levi Saleimoa sa matauina ai le auai ai o le Faipule o le Itumalo o Sagaga 4 le afioga ia Tagaloatele Pasi Poloa, faapea le alii loia lea sa tauvaina foi le nofoa faapalemene, ia Tuisa Tasi Patea.
Job Vacancy and Tender Notice
- “O se meaalofa mo si o’u tamā ua fai’ilagi lana folauga, ma si o’u tinā sa tapua’i ma loimata” - December 1, 2023
- USD$500 ua Faasalaina ai Samoa Airways e le Malo o Amerika Samoa i le Mataupu a le Faipule Salega 1 - November 30, 2023
- Faamaonia Moliaga a se Alii sa Faigaluega i Le Ofisa o Tiute i Lona Aumaia o Fualaau Faasaina i Totonu o le Atunuu - November 30, 2023
