Talosaga Afega e teena le Faamasino Sili mai lona Tagofia o Mataupu o loo Feteenai ai ma Leauvaa

0
1030

Ua tuuina atu se talosaga a Alii ma Faipule o Afega e teena ai le Faamasino Sili mai lona tagofia o le mataupu o loo feteenai ai ma Leauvaa.

E le’i taunuu ona fofogaina le talosaga a le afioaga o Leauvaa e pei ona faatulagaina mo le vaiaso nei, e uiga i le lē usitaia o Afega o le talosaga le tumau a le Faamasinoga Maualuga (interim order), ina ia taofia ai le suaina o fanua o loo nofoia e Leauvaa, ae sei tālia iloiloga a le faamasinoga.

O lenei mataupu ua savali nei i le 70 tausaga ma le iva faaiuga a le Faamasinoga o Fanua ma Suafa (LTC) ua tuuina mai, e faamautu ai le pulea o Afega o eleele o loo nofoia e nisi o le afioaga o Leauvaa.

O nei eleele ua tā’uaina o fanua o loo i tua atu o le 723 eka e pei ona lipotia ma faasalalauina i le tele o masina ua tuanai atu nei. I nei lava fanua ei tua atu o le 723 eka, e le gata o Leauvaa, ae faapena foi ona finau ai nisi o Tuanai ma Levi Saleimoa.

O le amataga o Aperila sa tuuina mai ai e le Faamasinoga o Fanua ma Suafa, e tatau ai ona faatula’i ese aiga uma o Leauva o loo nofoia ia nei eleele o loo finauina.

Peitai, sa tuuina atu se talosaga a Leauvaa i luma o le Faamasinoga Maualuga, e finauina ai, ua ōia a latou aia tatau tau le faavae (constitutional rights), i faaiuga a le Faamasinoga o Fanua ma Suafa.

Ae o loo finauina fo’i e le afioaga o Afega, ua aafia fo’i a latou aia tatau e tusa ai ma le lē tula’i ese o Leauvaa mai fanua ua mae’a ona iloiloina ma fai iai faaaiuga a le LTC.

Ina ua valaauina lenai mataupu i luma o le Faamasinoga Maualuga i le amataga o Aperila, sa tuuina mai ai se poloaiga a le afioga i le Faamasino Sili ia Satiu Simativa Perese, ina ia taofia le tumau le galuega a Afega, ae sei tālia le iloiloina o talosaga ua oo atu.

O le Aso Lua o le vaiaso ua mavae sa tuuina mai ai le poloaiga a le Faamasino Sili e taofia le tumau ai le galuega a Afega, ae o le Aso Tofi na toe faatino ai galuega a le afioaga o Afega i Leauvaa.

Ina ua toe valaauina lenei mataupu i le vaiaso nei, sa faailoa ai e le tamaitai loia a le afioaga o Leauvaa ia Sala Josephine Stowers, o lea ua faaulu atu se talosaga a Afega e teena ai le Faamasino Sili, le afioga iā Satiu Simativa Perese, mai lona tagofia o talosaga a itu e lua o loo taoto nei i luma o le Faamasinoga.

Loia mo Leauvaa afioga ia Sala Josephine Stowers.

O lenei lava mataupu, e tolu itu ona o loo tula’i le Ofisa o le Loia Sili mo le Faamasinoga o Fanua ma Suafa.

O le vaiaso nei na atofaina e iloilo ai le talosaga a le afioaga o Leauvaa lea na faaulu atu i le vaiaso talu ai, e tusa ai ma le lē usitaia o Afega o se poloaiga a le Faamasinoga Maualuga ina ia taofia mo se taimi lē tumau galuega o loo faatinoina nei i Leauvaa.

O se poloaiga le tumau, ae sei tālia taualumaga o le Faamasinoga, ma iloiloina le talosaga a Leauvaa.

I le toe valaauina o le mataupu i le vaiaso nei, sa faatagaina na o loia ma le Faamasino i totonu o le potu faamasino (closed Court). E le’i mafai ona taliaina le mamalu o le afioaga o Leauvaa sa auai atu, poo soo se isi lava i totonu o le potu faamasino.

Na o loia sa faatagaina i totonu o le potu faamasino.

Sa maitauina foi, e le’i auai atu se isi o le afioaga o Afega i Mulinu’u, ae ua na o Leauvaa na auai atu i le faamasinoga.

O le Aso Lulu o le vaiaso fou o le a toe valaauina ai lenei mataupu e tusa ma talosaga a afioaga e lua o loo i luma nei o le Faamasinoga Maualuga.

Faasalalauga Tāua mai le Samoa Business Hub:

 

Faasalalauga Tāua mai le Samoa Ports Authority:

Faasalalauga Tāua mai le UTOS

Faasalalauga Tāua mai le National Bank of Samoa