Talia ma le Fiafia e le FAST le Faaiuga o le Faamasinoga e foi e Tauaofia le Palemene

0
1694

28 Iuni 2021, Apia Samoa. Ua fa’aalia le agaaga fiafia o le Ta’ita’i o le Vaega Fa’aupufai a le Fa’atuatua i le Atua Samoa ua Tasi (FAST), le afioga i le Sa’o Fa’apito ia Fiame Naomi Mata’afa e tusa ai o le fa’ai’uga a le Fa’amasinoga Maualuga e pei ona fofogaina i le aoauli o le Aso Gafua 28 Iuni 2021.

O lenei saunoaga a le afioga i le Sa’o Fa’apito na fa’atautaia i le ofisa tutotonu o le FAST i Tuana’imato.

Saunoa Fiame, o lea ua toe tu’u avanoa mai le Fa’amasinoga ina ia toe tata’i i le moa o le ala ia Samoa, e ala i le tatau ona tauaofia o le Fono Usu a le atunu’u ma fa’atauto sui o itumalo o le atunu’u na tusi lima iai Samoa i lana faigapalota.

“O le taua o le fa’ai’uga i lenei aso ua maua ai se tali e savavali ai i luma ma fa’ataunuu le fa’amoemoe o le atunuu ina ia tauaofia lana Palemene aemaise o sui na filifilia e le atunu’u;

“Ua talia lelei e le Aiga o le Fa’atuatua i le Atua Samoa ua Tasi le fa’ai’uga a le Fa’amasinoga, matou te manatu ua toe tu’u avanoa mai le Fa’amasinoga e fa’asino ala o mea e tusa ai ma le tulafono i le fa’ataunuuina o le tauaofia o le Palemene ma le fa’atautoina o sui o itumalo e 51,” o le saunoaga lea a Fiame.

O le fa’atautoga e pei ona fa’atautaia i le aso 24 o Me, na saunoa le ta’ita’i o le FAST, o se fa’amoemoe na mafua ona faia ina ia tusa ai ma ala o le tulafono ma le i’uga e pei ona tu’uina mai e le Fa’amasinoga, aemaise e tatau ona tauaofia le Palemene i totonu o le 45 aso i le mae’a ai o le faigapalota tele a le atunu’u.

Saunoa Fiame…”Ua avea lea sauniga ma mata’upu ua luiina ai e le Loia Sili a le Malo lea sauniga i le tulaga e fa’afesiligia ai pe tusa ai ma le tulafono;

“O le fa’ai’uga o le fa’amasinoga i lea mata’upu ua fa’apea mai le fa’amasinoga, ua lē fa’amaonia lea sauniga sa fai i le aso 24 o Me, e le’i auai le Ao Mamalu o le Malo”.

“Ao lea o lo’o fa’apea mai foi le fa’ai’uga a le Fa’amasinoga e ao lava ona tauaofia le Palemene i totonu o le 7 o aso, a fa’apea o le a lē fa’ataunuuina lea fa’atonuga a le Fa’amasinoga, o le a toe foi loa le Fa’amasinoga e iloilo le mata’upu o le fa’atautoga i le aso 24 o Me ma amana’ia ai ona faaauau le faigamalo,” o le saunoaga lea a Fiame.

Sa saunoa foi oe taitai o le FAST, e tele ni vaega na tuta’ia ai taumafaiga a le FAST ina ia fa’atino ala o le tulafono, peita’i o lea ua toe aumai lenei avanoa taua ma e tu’uina atu i le Malo latou te fa’atautaia lea poloa’iga.

“I le aso la ma le fa’ai’uga ua ta’atia mai, fa’afetaia ia le alofa ma le agalelei o Le Atua, tatou te savavali ai i se auala e maua ai le filemu ma toe tata’i i le moa o le ala le fa’amoemoe, ma uia ala o mea e mulimulita’ia le tulafono”.

I le taimi nei, e tasi le nofoa o le Palemene ua faaleaogaina i le faasologa o faamasinoga o faigapalota (election petitions) i le afioga ia Seiuli Ueligitone Seiuli. O lea o le a toe foi ai Sagaga 2 mo le palota laititi.

O le taimi nei la o loo 26 le FAST ae 24 le HRPP, ae o loo tuuina mai lava faaiuga o faamasinoga i vaiaso taitasi, ma e iai le avanoa e sui ai foi lea numera pe a iai nisi sui e le manuia latou mataupu.