E fā ni tino maliu o loo tālia nei se fomai mai Fiti na te faataunuuina taotoga faapitoa, aua le faasologoa o suesuega a leoleo i le mafuaaga sa malilu ai.
Saunoa le Sui Komesina o le Matagaluega a Leoleo ma Falepuipui, Papalii Monalisa Tiai-Keti, ua ma’ea ona tuuina atu se talosaga i le Ofisa o le Loia Sili mo se fomai faapitoa (coroner), ma ua maea foi ona tuuina atu le talosaga i Fiti mo lenei faamoemoe.
Ona o le leai ai o se fomai faapitoa i Samoa na te mafai ona faataunuu taotoga o tino maliu (autopsy), lea ua auma ai fomai faapitoa mai Fiti.
E le o se taimi muamua lenei. Sa sau foi se fomai mai Fiti i le masina o Iuni, e faasolo taotoga mo tino maliu sa iai pea i le falemaliu i Motootua.
E i le va o le $30,000 i le $40,000 le tau aofai e aumai ai e le Malo o Samoa se fomai faapitoa mai Fiti. E masani ona tasi le vaiaso e nofo ai se fomai mai Fiji, ma faasolo uma ni taotoga o loo moomia.
A oo foi la i aso o faamasinoga e moomia ai le molimau o nei fomai faapitoa, e toe aumai foi aua taualumaga o Faamasinoga.
Peitai e iai nisi o faamasinoga sa molimauina ai, sa mafai lava ona tuuina mai le molimau a fomai faapitoa i luga o upega tafailagi poo le video call.
O se faalavelave matautia i le afioaga o Afega na maliliu ai ni tamā se toalua i le Vaeluaga (New Years Eve) o le 2021, ina ua faamanuiaina i laua i se laau malosi. Sa molia e leoleo Vaotuua (Vao) Faalavaau Tai’i Auleoleo Neemia Pologa i le fasioti tagata faamoemoeina (murder).
Peitai o Setema o le tausaga nei sa talosaga ai le Ofisa o le Loia Sili e toe tuu mai ai i lalo moliaga I le fasioti tagata paivalea (manslaughter).
Ae o le mafuaaga na tuuina mai, ona ua le mafai ona oo mai le fomai faapitoa mai Saina, lea sa ia faafoeina le taotoga (autopsy).
O le isi aafiaga tele o le tau aumai o se fomai faapitoa mai fafo, o le taimi lea e faatali ai nai aiga e ave i tua tino maliu sei tulou, mo a latou toe sauniga.
Saunoa Papalii, o le masina fou ia Tesema o loo fuafua ai e taunuu mai ai le fomai mai Fiti e faaoo taotoga o tino maliu uma nei e fā.
(0)
