Talia e se Alii na Sola Ese mai Leoleo i le Fale Faamasino ona Moliaga

0
351

O se Alii na taofia i lalo o vaavaaiga a leoleo ae na sola ese mai le fale faamasino i Mulinuu, ua ia ioeina moliaga e 10 a le itu a leoleo e faasaga ia te ia.

O Sonny Crichton na sola ese mai le fale faamasino i le lua vaiaso talu ai, ina ua aumai o ia i le fale faamasino mo le valaauina o lana mataupu.

E le’i umi se taimi o sue lenei alii, ma toe vave faaoo atu ai i Tafaigata ma toe tuuina atu ai i lalo o le vaavaaiga a leoleo.

O lea alii sa molia i le uumiaina lea o laau faasaina o le marijuana ma se mea faitino e ula ai le aisa.

O loo iai foi ma moliaga o le gaoi ma le talepe fale, faapea le tuuina ifo o faamatalaga sese aga’i i leoleo. Peitai na toe talosaga leoleo e aumai i tua le moliaga o le taufaasese.

O le sola ese mai i leoleo, lea sa toe faaopoopo ai ma nisi moliaga faasaga ia te ia.

I faamaumauga a leoleo, o le tausaga 2022 na amata mai ai soligatulafono e aafia ai Sonny.

O loo nofo taofia pea lea alii seia talia ai le Aso 11 o Aperila e tuuina mai ai le faasalaga a le faamasinoga e tusa o moliaga ua ia ioeina.