Aso Lulu 14 Ianuari 2026. Tusia: Pesetā Tusiga Taofiga, Ofisa o le Sooupu a le Malo. Na fa’afetaia e le afioga i le Palemia, Susuga i le La’aulialemalietoa Leuatea Polāta’ivao Fosi Schmidt, le tautua matavela a le afioga iā Nanai Taofiga Laveitigā Tuiletufuga, a’o avea ai ma Ofisa Sili Lagolago mo le Matāgaluega a le Palemia ma le Kapeneta, o ia fo’i sa avea ma So’o’upu a le Mālō, a’o le Fa’atonu mo le Nusipepa a le Mālō, le Savali.
Saunoa La’aulialemalietoa, e ma’eu le tautua a lenei tamāli’i, ma e fa’afetaia fo’i lona sao i le galue punoua’i ma le tautua lē fa’alogologotigā, a’o galue ai mo le Mālō i nei tausaga e tele.
Sa fa’ailoa e le Palemia, le talia aloā’ia ai e le Kapeneta i lana Fonotaga i le asō, le fa’amavaega aloā’ia a Nanai.
Sa fa’atulaga fo’i i le asō, le talanoaina o le taunu’uga o le lipoti o su’esu’ega a le Komisi o Galuega a le Mālō [P.S.C.] i lana fautuaga fa’aletulafono i se fa’ai’uga talafeagai e afua i le sesē o Nanai i le Pepa o Fa’amatalaga a le Mālō na ia tapenaina, i le tofiga fou mo le Fa’atonu Sili Aoao o le Matāgaluega o le Soifua Mālōlōina.
Ua ta’oto ai i le agatonu le taunu’uga o lenei matā’upu, e pei ona su’esu’eina ai le sesē o le lipoti sa tusia e Nanai.
Ua fa’ailoa manino fo’i e Nanai, o le fa’aletonu ua tupu ma le sesē ua tula’i mai, o ia lava e pa’ū iai, ma ua ia talia fo’i lana fa’ai’uga i lona loto malie, i lana fa’amavaega aloā’ia ua tu’uina atu i le Palemia ma le Kapeneta.
I le saunoaga a le Ta’ita’i o le Mālō i nisi o ana Feiloā’iga ma Ofisa Fa’asalalau ina ua tupu lenei fa’aletonu, e āoga mea ua tutupu, e matimati ma poupou ai se moemoe fou mo le aufaigaluega a le Mālō..
E tāua le siaki lelei o galuega ua fa’atino, ma toe fesili po’o sa’o ma talafeagai taunu’uga o galuega ua faia mai lea taimi i lea taimi, e vaoia ai ni fa’afitauli ogaoga e ono tutupu mulimuli mai.
E faamavae le afioga ia Nanai i le maea ai o le ono tausaga soso’o, o ia tau’aveina lenei tofiga tāua i totonu o le Mālō.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
