Ua talosaga le Sui Faipule a Salega 1 i luma o le Faamasinoga mo se faatagana e malaga ese atu ai ma Samoa mo fuafuaga faaleaiga.
O le talosaga a le afioga ia Fepuleai Faasavalu Faimata Su’a, na tauala mai lana loia ia Muriel Lui, mo se avanoa e malaga ese atu ai ma Samoa.
Ua faailoa e Muriel Lui, o se fuafuaga faaleaiga o loo moomia ai le Faipule. Sa fofogaina lenei mataupu i luma o le Faamasinoga Faaitumalo i le vaiaso nei.
Na talia e le afioga i le Faamasino Sinia o le Faamasinoga Faaitumalo ia Talasa Sa’aga Atoa le talosaga.
Sa tuuina atu se poloaiga e malaga ese atu ai ma Samoa i le Aso 10 Novema ae toe taliu mai i le aso 22 o Novema 2024.
Ua faailoa foi e le tamaitai faamasino le tatau lea ona usitaia le avanoa ua tuuina atu aemaise aiaiga o le tatala ai o ia i tua (on bail).
O Fepuleai e 18 moliaga o loo molia ai nei o ia i luma o le faamasinoga. O moliaga e aofia ai le faia lea o ni faamatalaga taufaasese ma le fafauina o faamatalaga le sa’o ua aafia ai suesuega a leoleo.
O le Sui Faipule lea sa fai ma Minisita Lagolago o Leoleo iā Fepuleai Fa’asavalu Su’a, o loo molia faatasi ma le tamaitai ia Lise Schmidt, ma le alii leoleo iā Inspector Li’o Faataumalama Auava, faapea le ulugalii ia Samuelu Fauena ma Sivai Kepi.
O le mataupu o loo tuuaia ai i latou uma nei, ona ua latou tuuina atu molimau sese e uiga i se tamaitiiti na maliu ao savali i luga o le auala i Vaitele (hit and run). O a latou molimau e faasaga i le tuuaia lea o le Sui Faipule Faleata 3 le tofa ia Lealailepule Rimoni Aiafi.
O Mati o le tausaga fou 2025 ua faatulagaina mo le suesueina o lenei mataupu.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025













