Faa-Samoa

Talia e le Faamasinoga le Talosaga a Lealailepule Rimoni Aiafi

April 16, 2023

Ua talia e le Faamasinoga Maualuga le talosaga a Lealailepule Rimoni Aiafi, e tauala mai lana loia ia Fuimaono Sefo Ai’nuu, e faaoga ai auala faatekinolosi faanei onapo (video link) e faatino mai ai lana molimau i le mataupu o le Faigapalota Laititi a Vaimauga 3.

Sa teena malosi e le Alii loia ia Fetu Lagaaia, o loo tulai mo Lautimuia Uelese Vaai, le talosaga e faaoga ai auala fesootaiga e faatino mai ai le molimau a Lealailepule.

“Saunoa Lagaaia, o Lealailepule o se tasi o molimau autu a le tofa ia Samau Leatigogo Timani Samau..”

Ma o le isi itu na faailoa e Lagaaia, o auala o fesootaiga faatekinolosi e iai taimi e faaletonu ai, ae le gata i lea o loo iai foi ni tuuaiga o le faatosina o loo faasaga ia Lealailepule.”

Peitai, na saunoa le Faamasino Sinia o le Faamasino Maualuga ia Vui Clearance, o le auai ma le lē auai o se molimau, o lana lea faitalia.

O le isi fo’i itu tāua sa tuuina mai e le Alii Faamasino, “O Lealailepule e le’i tauva i le faigapalota a Vaimauga 3..”

Sa tuuina atu foi e Lagaaia se talosaga i luma o le Alii Faamasino ia Vui Clarence Nelson mo se faatagana e talia ai nisi molimau se lua faaopopo mo le latou itu, e ui ina ua ma’ea le taimi faatulagaina e tatau ai ona faaulu atu molimau.

Peitai, na saunoa le Faamasino Sinia o le Faamasino Maualuga, e lē taliaina le talosaga mo ni molimau faaopopo ona ua pasi le taimi.

E 12 molimau a le itu a Lautimuia e faasaga i le itu tagi le tofa ia Samau, ae toatolu molimau a le itu a Samau e faasaga i le talosaga (counter petition) a Lautimuia Uelese Vaai, lea sa manulamo i le Palota Laititi.

O le Aso Lua o le vaiaso fou 18 Aperila o le a suesueina ai mau a itu e lua i le mataupu o faigapalota laititi a Vaimauga 3.