Talia e Fagali’i le toe Tatala o le Malae Va’alele

0
46
Matai o Fagalii

E ui i se atugāluga a’o se popolega na fa’aālia e nisi o tamāli’i o le afio’aga o Fagali’i i le taimi ua sola, e ala i le fuafuaga a le Mālō mo le toe tatalaina o lea malae va’alele, peita’i ua to’amālie lava i le agatonu le finagalo o le nu’u ma ua talia ai le toe fa’aāogaina o lenei malae va’alele.

E pei ona silasila, o le afuaga na atugalu ai Fagali’i, ona o le popole i se soifua ma’imau i se fa’alavelave fa’afuase’i mai va’alele e lavevea i lea nofoaga, o le pa’ō leo tetele o va’alele pe a afea lea nofoaga, fa’atasi ai ma le asu mai afi o va’alele o lo’o manavaina pea e tagata o lo latou nu’u i aso ta’itasi.

Peita’i, ua le’o lea le finagalo fetāla’i o Fagali’i i lenei vaitau, e tusa o le pepa o fa’amatalaga mai le Ofisa o le afioga i le Minisitā o le Matāgaluega o Galuega Tetele, Fela’uā’iga ma Atina’e ‘Ese’ese iā ‘Olo Afoa Fiti Va’ai, na fa’ailoa manino ai, ua talia ma ua mālilie fo’i i ai le pāia o le nu’u o Fagali’i, ina ia toe fa’aauau le tautua a lenei malae va’alele e fa’afaigofie ai feoā’iga i le va o Samoa na lua fa’apea isi atunu’u tuāoi o le Pasefika.

Ua mae’a le soālaupulega i le va o le Mālō tauala atu iā te ia o le Minisitā (‘Olo Afoa Fiti Va’ai) ma Ali’i ma Faipule o Fagali’i ma ua tasi moemoe ai le tōfā ma le fa’autaga e toe tatala le malae va’alele.

O nisi o ālamanuia o le a maua e le nu’u o Fagali’i pe a toe tatalaina lenei malae va’alele, e aofia ai le fa’afaigaluegaina o ona tagata, si’itia o tupe maua a faleoloa ma ta’avale la’u pasese fa’atasi ai ma le tu’uina atu o galuega fa’aleleia faifaipea mo le malae va’alele e va’aia ma teu lava e le nu’u.

O le pine fa’amau lea, o le matuā mautū o lea maliega e pei ona mālilie uma i ai itu e lua.

Fa’ailoa e lea pepa o fa’amatalaga, le momoli o le fa’afetai fa’apitoa a le Mālō e tauala atu i le afioga iā ‘Olo o le Minisitā i le loto tetele ma le amanaia e le pāia o le afio’aga o Fagali’i o se taumafai atu a le Mālō auā le manuia lautele o nai o tatou tagatānu’u.

Le pāia lava lea o le afio’aga o Fagali’i, auā le afifio o Alalatama (Fuamatu ma Fuamatu), Afifio Tuisugaletāua ma Luamanuvae, Afifio Gafa (Leali’ie’e ma Leali’ie’e); Alalata’i Pulemagafa ma le Faigā, ma i lāua na Talia le Tanoa, Susū mai le Igaga o le Fale ma le Nofoitu’āiga iā Saleupolu.

O le Aso Gafua, 29 Me 2023, o le a toe tatala ai lenei malae va’alele, auā faigāmalaga masani a va’alele o le a fa’aāogaina.

Ata Pu’eina: Ofisa o le Minisitā o le Matāgaluega o Galuega Tetele, Fela’uā’iga ma Atina’e ‘Ese’ese (M.W.T.I.) – ‘Olo Afoa Fiti Vaai.


Tusiga Taofiga