Tali Tetee atu ni Tinā i Moliaga o le umia o Laau Faasaina

0
501

Ua fa’aalia le tali tete’e a le tamaita’i o Ana Fuimaono o se tasi o le toa ono o i latou o lo’o molia mai le osofaiga a leoleo i se aiga i Faatoia i le tausaga na mavae nei.

O le toa ono o i latou nei sa tutula’i i le faamasinoga i le Aso Gafua o le vaiaso ua mavae atu.

E aofia ai le tamaitai o Ana Fuimaono (Vaiusu) Esther Tagi (Tufuiopa), o le alii o AJ Roache (Lotopa), Stuart Stuart Tuitama (Faleasiu), Pitoitua Aloese (Faatoia) ma Sanele Schuster (Alamagoto).

O moliaga o lo’o molia ai i latou nei e eseese uma lava e aofia ai le umia o le fualaau fa’asaina o le aisa (meth) faapea fualaau fa’asina o mariuana, (lala, lau, fatu).

O loo iai foi moliaga o le mauaina ai o se laau malosi e le faatagaina i Samoa nei, o le ituaiga o le 38 Pistol Revolver, atoa ai ma le moliaga o le umiaina o lea laau malosi.

O loo te’ena e le itu a leoleo le tatalaina o alii e toafa i tua. Na faailoa mai mafuaaga ona o le alii o Sanele Schuster o lo’o iai le talaaga o nisi o solitualfono lea e faapea sa palola i tua i le tausaga e 2003, ae toe solitulafono mai i le 2007.

Sa talosagaina e le loia a nei alii le tatalaina o i latou i tua, peitai sa poloaia e le faamasinoga le faila mai talosaga tusitusia e iloilo.

Sa toe tutulai i latou uma nei i le taeao analeila, o le tamaitai o Ana Fuimaono lea ua ia teena ona moliaga ua faatulaga mai lana matupu e sueuseina i le faamasinoga i le aso 5 o Oketopa, 2020.

O alii e toafa o loo faatulaga e toe valaauina i le aso 24 o le masina nei, e iloilo ai le talosaga pe tatala i latou i tua.

O le osofaiga a leoleo sa faatinoina i le aso 26 o Tesema, 2019 i le maea ai o le Kerisimasi.

Na o’o atu leoleo e fesoasoani i se mataupu tau sauaga i aiga i le aiga lenei i Faatoia.

E faapea o le tina o se tasi o tamaita’i o loo molia na oo atu e asi lana tama, ae ona maua ai sa fasi, ma sa iai tulaga ogaoga i ona foliga.

Sa o’o mai lea tina i le ofisa o leoleo ma faamatala loa iai le masalosaloga a lenei tina, o loo faatauina o le fualaau faasaina o le aisa poo le Meth i lea nofoaga.

Sa o’o atu leoleo, ma maua ai fualaau faasaina o le aisa i lenei nofoaga, ma faatino ai loa le sailiga a leoleo, ma molia mai ai loa i latou nei.


Maina Vai