Tali le Ofisa Sili o le Soifua Maloloina i le Mafuaaga sa Faaletonu ai le Auaunaga Fale Talavai

Ua saunoa le Ofisa Sili o le Matagaluega o Soifua Maloloina, o le taeao nei le Aso 6 o Mati, lea ua faamautu mai ai le toe maua uma lea o vai ma fualaau sioki i le faletalavai i Motootua.

I se faatalanoaga ma le Aiono Dr Alec Ekeroma, sa ia faasoa mai ai i nisi o mafuaaga sa lē maua ai fualaau ma vai i le fale talavai i Motootua.

Saunoa le afioga Aiono Dr Alec Ekeroma, o le lua vaiaso talu ai, sa tulaga faaletonu ai le sapalai (supply) o fualaau ma vai, o le mafuaaga, o le tuai ona totogi atu ma faatino peimeni mo kamupanī o loo aumai ai a tatou oloa i le faletalavai.

E tusa ma le ono masina o loo tuai ai tatou peimeni ia e moomia ona tuuina atu mo kamupani nei mai fafo.

“O le isi itu o le utiuti o le faitotoa o loo auina mai ai tatou oloa. Ua na’o Niu Sila ma Ausetalia, ae afai la ae faaletonu mai Niu Sila, e na’o Ausetalia latou te sapalai maia a tatou fualaau, e faapena foi pe a faaletonu mai kamupani Ausetalia, e nā o Niu Sila e mafai ona maua mai ai fualaau, ae ua tatau ona tatou faipaaga na ni kamupani mai isi atunuu e pei o Initia ma isi lava atunuu.”

Ma le isi loa itu i le saunoaga a Aiono, o le tuai lea o feoaiga vaa-a-lalo (sea freight).

Na saunoa foi le ofisa sili, “sa iai foi tatou faigapa’aga ma Amerika Samoa peitai, e uma lava le ono masina o loo tālia e Tutuila se payment, e pei o le tasi na faafitauli e toso ai lea tulaga.”

“O le lua vaiaso talu ai, na maitauina ai le utiuti ma le lē maua o fualaau ma vai mo le tele o gasegase aemaise lava i fualaau mo gasegase mo le ma’i suka ma vai ma fualaau mo le fanau.”

Saunoa Aiono, ua ma’ea le latou fonotaga ma sui o fale talavai i Samoa nei, na soalaupule ai auala e foia ai le faafitauli, e pei o le tali mai lea i mana’oga o le fale talavai i Motootua.

Na taua foi e Aiono, o loo taumafai se fuafuaga e mafai ai ona fefa’asoaa’i ma faauluuluga o le Soifua Maloloina i le Pasefika, e mafai ai ona faa’aoga fesootaiga televavave (online) e faatino ai ni tali i tatou manaoga.

“E faapena foi ona tatou tali atu i manaoga o se isi atunuu o le Pasefika i le itu tau fualaau ma vai mo togafitiga.”

Ua saunoa le Ofisa Sili, o le taeao nei le Aso 6 o Mati, lea ua faamautu mai ai e Aiono, le toe maua uma lea o vai ma fualaau sa lë maua i le faletalavai i Motootua.

(4)