PEPA O FA’AMATALAGA – 23 Mati 2022
TALA LATA MAI O LE PEPESI AI TUA O LE FA’AMA’I, KOVITI – 19
E fautuaina le mamalu o le atunuu, o le asõ, Aso 22 Mati 2022 ua fa’amaonia mai ai e le Matagaluega o le Soifua Maloloina le fa’aopoopo ai o le to’a 155 oi latou fou mai le mamalu o le atunuu ua a’afia i le siama o le KOVITI-19 i totonu o le 24 itula talu ai. Ua fa’amauina mai le si’itia o le aofa’i oi latou ua a’afia i le fa’amai i le taimi nei i le 622 talu mai le Aso 17 o Mati 2022. O le 622 ua a’afia i le fa’amai, e aofia ai le 606 oi latou o loo nonofo i Upolu ma le 16 mai le motu o Savai’i.
E 940 suega (tests) sa fa’atinoina mai le Aso Lua 22 Mati ma le Aso Lulu 23 Mati 2022, i nofoaga fa’apitoa e 17 ua fa’atulagaina, fa’atasi ai ma suega sa fa’atinoina i falema’i. O lenei aofaiga ua fa’amauina e 827 suega (tests) na fa’atinoina mo le motu o Upolu ae 113 suega (tests) na fa’atautaia mo Savai’i.
E tusa ai ma fa’amaumauga a le Matagaluega o le Soifua Maloloina, oi latou mai le 15 tausaga le matutua e agai atu i le 35 tausaga, o loo maualuga ai le pasene (percentage) o tagata ua a’afia i le KOVITI-19.
(0)
