Tala Lata Mai o le Koviti-19 i Samoa: Aso 2 Aperila 2022

0
267
File Photo: GOS. Faleolo Arrival area set for screening of all passengers on Samoa's first repatriation flight, May 2020.

Ao iai pea Samoa i lalo o tulafono o le vavao (alert level 3 lockdown), o nisi nei o tala lata mai o le pesi ai o le koviti i totonu o le atunuu.

1. Taunuu mai Tali o Suesuega o le Koviti 19 mai Niusila.

O lea ua maea suesuega ma faamaonia ai o le Omikoroni BA1 le ituaiga vairasi o loo pesi nei i Samoa. Mo le silafia e tele ituaiga vairasi e pei o le Delta lea sa amata mai le faamai i le tausaga 2020. O le Omikoroni foi, e iai le BA1, BA2 ma le BA3.

E silia ma le 50 suega poo tests mai i ai latou na aafia, sa auina atu i Niusila mo suesuega. O lea la ua maua mai ai tali o nei suesuega, ma faamaonia ai o le ituaiga o le BA.1 o le Omikoroni lea ua pepesi i le atunuu. O le ituaiga lenei o le Omikoroni, e le mamafa ona auga e pei o le Delta, ae peitai, e matuai saosaoa lava lona pepesi.

2. Toafa le Pasese a le Vaalele 29 Mati mai Niu Sila ua aafia i le Koviti. 

E 219 le aofai o le pasese na taunuu mai i Samoa mai Aukilani i le Aso Lua, 29 Mati. Sa faatino uma a latou suega ina ua taunuu i Faleolo, a o lei se’e atu i nofoaga o loo faanofoesea ai. Ua maua mai i tali o nei suega, e toafa (4) le pasese ua faamaonia le aafia i le Koviti. O le a toe faatino isi suega a le pasese a taeao, Aso Toonai, 2 Aperila 2022.

I le faamaonia ai o le aafia o le toafa (4) o le pasese na malaga mai Niusila i le Aso 29 Mati i le Koviti 19, ma le tulaga o loo iai nei le atunuu i le pepesi o le faamai, ua toe suia ai le umi e faanofoesea ai le pasese i le 10 aso. O lenei faaiuga ua suia ai le uluai faaiuga na tuuina atu muamua i le faanofoesea ai i le fitu (7) aso i latou na taunuu mai i le atunuu i le Aso 29 Mati.

3. Aofai o latou ua aafaia i le atunuu lautele

I le ta tonu o le 2:00 i le aoauli o le asō, Aso Faraile, 01 Aperila 2022, ua fa’amaonia ai e le Matāgaluega o le Soifua Mālōlōina le a’afia ai oi latou fou e 245 mai le mamalu lautele o le atunu’u. Ma ua si’itia nei i le 2,076 i latou ua a’afia talu ona sao i tua le fa’ama’i i le Aso 17 Mati 2022. Ua fa’amauina e 583 i latou sa a’afia i le fa’amai ua toe fa’afoisia le malosi ma toe maloloina, ae o loo tumau pea le 1,493 i latou o loo a’afia i le siama mo le taimi nei.  Tusa lea ma le 97% oi latou ua a’afia o lo’o aumau i Upolu nei ae 3% o lo’o i Savai’i ma o lo’o tumau pea le malu puipuia o Motu o Manono ma Apolima – Tai.

 4. Tausaga o loo maualuga ai latou o loo aafia i le Koviti 

Ua fa’amauina e le Matāgaluega o le Soifua Mālōlōina o le va i tausaga o lo’o mafuli ai latou o lo’o a’afia i le siama o le Koviti-19 o le 15 – 35 tausaga e fa’apea fo’i i le 35 – 55 tausaga le mātutua.

Petai, o loo maitauina foi le siisii o pepe e i lalo ifo o le 4 tausaga, faapea foi tagata matutua o le atuunuu. E 120 le aofai o pepe e i lalo o le 4 tausaga, ae 165 le aofai o e matutua atu o latou soifua i le 60 tausaga, o loo maua ai nei i le faamai (active cases).

O lo’o maitauina fo’i le si’itia oi latou o lo’o a’afia mai le 4 tausaga ma lalo ifo, fa’apea foi i latou ua a’afia mai le 65 tausaga ma luga atu le matutua.

E 20,643 su’ega (RAT TESTS) ua faia mo le mamalu o le atunu’u talu ona pepesi i tua le fa’ama’i.  Afai la e fua i le toa 2,067 lea sa test positive, o lona uiga e 10% o e o loo test, o loo maua i le faamai.

5. Tuiga Tele o le Koviti

Ua fa’amauina e 339,214 tui o le Koviti-19 ua fa’aaluina mo le tuiga iā Samoa atoa. O lea aofa’i e aofia ai le 36,806 tui o le Pfizer mo fanauiti 5 – 11 tausaga le mātutua, 48,647 tui o le Pfizer mo fanau 12 – 17 tausaga ma le 253,761 tui o le AstraZeneca ma le Pfizer mo tagata mātutua 18 tausaga ma luga atu.

I fa’amaumauga lava mai le Soifua Mālōlōina, e 96.7% o Samoa atoa e tatau ona tui ua mae’a o latou tui muamua, 69.3% ua uma o latou tui lona lua, fa’atasi ai ma le mamalu o le atunu’u 18 tausaga ma luga atu e to’a 23,163 ua mae’a o latou tui fa’aopoopo (booster shots). E toe tu’uina atu se isi fa’amaumauga pea maea le fa’agasologa o tuiga o loo fa’atinoina mo le taimi nei.

FAASALALAUGA TAUA

E faailoa atu i le mamalu o le atunuu e faapea: o le Aso Tofi 07 Aperila 2022 o le a faatautaia ai le malaga Apia mo Pago Pago i le vaiaso fou. Nao uta e faatagaina mo lea malaga. Amatalia fuaina o uta mai le 9 i le taeao sei paia le 4 i le afiafi. Mo nisi fesili faamolemole fesootai le ofisa autu i Matautu tai mo le vaega a le Pago Service.

Faafetai