Tala Lata mai i le Pepesi ai Tua o le Koviti-19

0
60

PEPA O FA’AMATALAGA – Aso Gafua, 28 Mati 2022

TALA LATA MAI O LE PEPESI AI TUA O LE KOVITI-19

I le ta tonu o le itula e 2:00 i le aoauli o le Aso Gafua, 28 Mati 2022, ua fa’amaonia ai e to’a 125 i latou fou ua fa’aopoopo i le mamalu o le atunu’u lautele ua a’afia i le siama o le Koviti-19. Ma ua si’itia ai i le 1,364 i latou ua a’afia i le atunu’u lautele talu ona pepesi i tua le fa’ama’i i le Aso 17 Mati 2022, ae mo le taimi nei ua na’o le 1,288 i latou o lo’o a’afia pea.

O le 96% o e ua a’afia mai le mamalu o le atunu’u lautele, o lo’o nonofo i Upolu a’o le 4% o lo’o aumau i Savai’i ma o lo’o tumau pea le malu puipuia o Motu o Manono ma Apolima e aunoa ma se tasi ua pesia.

O lo’o fa’amauina fo’i e le Matāgaluega o le Soifua Mālōlōina o le 57% o e ua a’afia o tama’ita’i a’o le 43% o ali’i. Silasila i le kalafi o lo’o tu’uina atu i lalo ifo, o lo’o fa’ailoa manino mai ai o le 15 tausaga e agai atu i le35 tausaga o lo’o mafuli ai i latou o lo’o a’afia.

Figure 1: Vaevaeina i tausaga oi latou ua a’afia talu ona pepesi i tua le siama o le Koviti-19.

Ua fa’amaonia fo’i e le Matāgaluega o le Soifua Mālōlōina e 16,842 su’ega – (RAT Tests) sa faia talu mai le aso na mua’i pepesi ai tua le fa’ama’i.