29 Novema 2025 Press Release Gvt Press Secretariat. O le asō na molimauina ai e Tutuila ma Manu’a le fa’aaloalo mauāluga a Samoa Tuto’atasi e ala i lana Ta’alolo na masi’i atu ai le Afioga i le Ao Mamalu o le Mālō iā Tuimaleali’ifano Va’aletoa Suālauvī II ma lana Masiofo iā Faʻamausili Leinafo Tuimalealiʻifano, o le afioga i le Palemia iā La’aulialemalietoa Leuatea Polāta’ivao Fosi Schmidt ma le Faletua iā Tupea Heather Schmidt, le afioga i le Fofoga Fetalai iā ‘Au’apa’au Mulipola Aloitafua fa’apea le pa’ia o Tumua ma Puleono, ae ta’ita’i e le Fa’ilipū a Malu o le Mālō.
O le taupou sa mo’emo’e, o le afafine o lana Afioga i le Ao Mamalu o le Mālō.
:O tu ma agaifanua fa’aSamoa moni, e molimoli atu i tiuga fa’atupu ma tiuga fa’atamāli’i, e fai ma fofoga’aga o le loto ua tumu i le fa’afetai, ona o le amanaia e Ta’ita’i o Amerika Samoa o Ta’ita’i o le Mālō o Samoa Tuto’atasi e auai e molimau i le fa’apa’iaina ma le tatalaina aloā’ia o lo latou Maota Fono.”
O le afioga i le Minisitā o le Matāgaluega o Fa’amasinoga ma Matā’upu Tau Fa’amasinoga iā Fesola’i Apulu Tusi’upu Tuigamala na fai ma to’oto’o po’o fofoga o Samoa aoao, e momolia a tatou fa’aaloaloga e auala atu i le Ta’alolo.
O se tasi o itu mata’ina o le masi’i ai o Samoa e tali fa’aaloalo i le valā’aulia fa’apitoa a Amerika Samoa, o le fa’afiafia fa’apitoa ai lea o le Fa’ilipū a Leoleo i lenei sauniga fa’alemālō.
O lana Afioga i le Masiofo iā Faʻamausili Leinafo Tuimalealiʻifano na sausaunoa e ala i lana sa’asa’aga fa’atamāli’i e tauālugaina ai lenei fa’amoemoe tāua a Tutuila ma Manu’a, ae taotaoama atu ai le afioga i le Faletua o le Palemia iā Tupea Heather Schmidt.
Important Public Notices
