Aso Lulu 30 Mati 2022, Apia Samoa. O le aso ananafi 29 Mati 2022 na taunuu mai ai se vaa mai Niu Sila, ma ua faailoa mai e le Matagaluega o Soifua Maloloina, e 7 aso lea ua faaiugafonoina e le Kapeneta, e faanofoesea ai le pasese, e tusa ma le 220. Sa saunoa le Sui Faatonusili o le Matagaluega le afioga ia Dr Tagaloa Robert Thomsen i se feiloaiga ma le vasega o tusitala, e iai nisi o le pasese sa toe taliu i Niu Sila ina ua toe foi le vaalele, ona o i latou o fomai sa omai e momoli mai gasegase (medical escorts).
“O le fitu aso lea ua maea ona iloilo foi e le Kapeneta ma aumai ai le fautuaga i lea vaega.”
Sa saunoa Tagaloa, o lea foi ua maea ona tuuina aloaia mai lenei faaiuga i lalo o tulafono o le vavao, poo SOE orders. O lea la ua galulue foi le Matagaluega e faatino tulaga e pei ona fautuaina mai e le Kapeneta, lenei suiga fou, e faanofoesea ai faigamalaga i le 7 aso.
O loo iai nisi o loo faanofoesea mai le faigamalaga mai Fiti, e faaauau pea le latou taimi e pei ona iai, ae o le faigamalaga lea o le Aso Lua, 29 Mati, e amata ai loa le faiga fou lenei mo Samoa.
I lenei faaiuga, ua atagia mai ai le amata atu lava ona toe tatalaina faigamalaga mai atunuu i fafo, e tusa ai ma saunoaga a le afioga i le Palemia, Hon Fiame Naomi Mataafa, lea o loo ia fautuaina ai itu uma o le atunuu, le au fai pisinisi, faapea foi nuu ma alalafaga, ma Samoa atoa, e tapenapena loa mo le nonofo faatasi ma le faamai.
O le afioga i le taitai a le HRPP, le afioga ia Tuilaepa Sailele Malielegaoi, o loo toe taliu mai o ia i lenei vaa, faapea nisi o le mamalu o le atuunuu sa siimai atu foi i Niu Sila.
O le aso a taeao, Aso Tofi, e faataunuuina ai tui puipui o le Pfizer, mo tuiga lona tolu poo boosters, mo le mamalu o le atunuu i Upolu, ae o Savaii e faataunuuina i le Aso Faraile.
Sa saunoa manino le Palemia, o loo faatauaina taumafaiga e faatelegese le pesi o le faamai, ae faamuamua tui puipui, ina ia soo atoa Samoa ma booster, ma mafai ai loa ona tetee atu i le faamai.
(3)
