Talosaga Taualai Leiloa e sui lana tali i moliaga o le taupulepule e tagatavaleina le Palemia

0
1071

Sa talosaga le alii o Taualai Leiloa i le aso ananafi e ui atu i lana loia, le fia suia lea o lana tali atu i ona moliaga o le taupulepule e tagatavaleina le Alii Palemia o Samoa le Susuga ia Tuilaepa Dr. Sailele Malielegaoi.

O le aso ananafi i luma o lana Afioga i le Sui Faamasino Sili ia Vui Cleance Nelson na faailoa atu ai e le tamaitai loia ia Sarona Ponifasio, ua fia sui le tali ioe a Taualai i le tali tetee.

Sa fesiligia e le Alii Faamasino mafuaaga o le suia ai o le tali a Taualai, ae sa faailoa e le tamaitai loia ia Sarona Ponifasio, sa la talanoa ma Taualai ma o lea ua maea foi ona ia tilotilo i le molimau tusitusia a le o loo molia, o loo iai nai mataupu e talitonu le tamaitai loia, e tatau ai ona tali tetee atu Taualai i ona moliaga. E le gata i lea o le taimi na tali ioe ai lea alii e lei iai sana loia na tulai mo ia.

Sa saunoa mai le Alii Faamasino ia Vui e ao ona toe tolo atu lea mataupu, ina ia mafai ai ona tuuina atu se talosaga tusitusi mai ia Taualai e tusa ai o lona manao e suia lana tali tetee.

Ua tolopo ai la lea mataupu mo le aso 8 o le masina nei o le Aso Faraile o le vaiaso fou mo le tuuina atu o le talosaga a Taualai e tauala atu i lana loia.

E pei ona silafia o le mataupu lenei o loo nofo taofia ai pea Malele Paulo (King Faipopo) ma Lemai Sione, o i laua ia o loo teena moliaga o le taupulepule e tagatavaleina le Alii Palemia faatasi ma Taualai. O le Aso 9 o Setema sa valaauina ai le toatolu lea e tali i latou moliaga. Sa tali ioe ai loa Taualai ae tali tetee Lemai ma King Faipopo.

Tulai Lemai Sione, Taualai Leiloa ma Malele Paulo

I le Aso 11 o Oketopa sa tuu mai ai loa Taualai i luma o le Faamasinoga Maualuga mo le tolauina o le faasalaga i le moliaga sa tali ioe iai. Peitai sa le tuuina mai e le Sui Faamasino Sili se faasalaga i lea aso. Sa faatonuina e Vui Clarence Nelson le alii o Taualai e saili sana loia e tulai mo ia ae lei aumaia le faaiuga a le Faamasinoga.

O Taualai o loo nofo vaavaaia mo le taimi nei, ma  e le o taofia o ia i le falepuipui e pei o loo iai Malele Paulo ma Lemai Sione.

I le taumafai ai o Lemai ma Malele Paulo e saili se la bail hearing, sa ta’ua ai e le faamasinoga o Taualai Leiloa ma Alatise Vitale lea sa tagatavaleina Luagalau Levaula Kamu i le tausaga 1999, o loo faamoemoe iai molimau a le itu a Leoleo i lenei mataupu.


Maina Vai

Maina Vai of Fasitoouta is a mother of five. Maina has recently graduated with a Certificate of Customary Adjudication from the National University of Samoa.
Maina Vai