Suia i le Ioe le Tali a Taulealea Samalaeulu

0
178

8 July 2020, Mulinuu Apia.Tusia: Marieta H. Ilalio

Ua toe suia nei tali a ni taulele’a se to’afa lea na molia ma tu’ua’ia i moliaga o le fasioti tagata pa’ivalea e ala i se fa’alavelave na tula’i mai i le masina o Setema o le tausaga ua mavae.

O i latou nei o Mamoe Aiesi Lafoga, Foaga Ipu Piki, Leu Saulo ma Paulo Mika lea na o latou te’ena muamua lenei moliaga ina ua fa’ato’a ulua’i fofogaina i luma o le Fa’amasinoga Maualuga i le tausaga ua mavae.

O le aso Gafua lea na amatalia ai lenei iloiloga (trial) i luma o ni Fa’atonu (assessors) ae o le lona lua o aso ao faagasolo le mataupu, ae toe suia ai loa tali a i latou uma nei e to’afa ina ua mae’a se feutaga’iga a le afioga i le Tama’ita’i Fa’amasino ia Tafaoimalo Leilani Tuala Warren ma loia uma o itu e lua.

I le fa’ai’uga o lenei mata’upu ua fa’aleaogaina ai le iloiloga (trial) ae toe tolopo le mata’upu mo le fofogaina o se fa’asalaga a le Fa’amasinoga mo i latou uma nei i le aso 20 o le masina o Aukuso.

O lenei fa’alavelave na tula’i mai i le afio’aga o Samalaeulu ina ua togi e se tasi o taulele’a nei e to’afa le ta’avale a se tama o Samalaeulu lava.

Sa taua e le itu a leoleo e faapea sa faasuaava uma nei taulealea e toafa, faapea foi ma lē ua maliu.

I se folasaga a le tamaitai loia mo leoleo na taua ai faapea sa togi e se tasi o taulealea nei le taavale a lenei tama e toafitu nai ona alo. Sa palauvale le tama lea i taulealea, ma mafua ai ona latou tau’ai ia te ia i ni ma’a, ma maliu ai lava ona o le ogaoga o ni manu’aga na feagai ma ia.