Sui le Loia e Tula’i mo Vaa ma Maylynn Brown

0
2520

Ua savali ese le tamaitai loia sa tula’i mo Vaa ma Maylynn Brown, o se ulugalii e 253 moliaga o loo feagai ma i la’ua ma tuuaia i le faia o ni faamatalaga taufa’aleaga, upu faalumaluma, ma ni ata faasoesa.

I le toe valaauina o lenei mataupu i luma o le Faamasinoga Faaitumalo i le vaiaso talu ai, na faaleo ai e le tamaitai loia ia Muriel Lui, o ia o le a savali ese ma lenei mataupu.

Sa tā’ua e le tamaitai loia, o nisi o i latou o loo tagi i lenei mataupu e faasaga ia Vaa ma lona toalua, o nisi o loo faipaaga ma le latou ofisa loia (client).

Sa talia e le afioga ia Leota Raymond Schuster le talosaga a le loia ma ua tolopo ai le mataupu i le Aso 6 Fepuari 2024.

Na faailoa e Vaa Brown i luma o le faamasinoga, o le tamaitai loia ia Tanya Toailoa o le a tulai mo la’ua, ma sui tulaga ai i le ofisa loia sa tauavea lenei mataupu mai le amataga.

O le tausaga talu ai na tulai ai Precious Chang o le ofisa loia lava e tasi ma talosagaina se avanoa sei vaavaai ai i moliaga a le itu a leoleo.

O Vaa ma lona faletua ia Maylynn o loo la faatautaia se polokalame i luga o upega tafa’ilagi ua faaigoina i luga o le Facebook, “E Tu Manu ae le Tu Logologo“.

O loo tatala i tua i la’ua i lalo o aiaiga masani, o le taofia o pepa malaga, saini i le ofisa o leoleo i le ogatotonu ma le faaiuga o le vaiaso, ma le taofia ona toe faia nisi faasalalauga e pei ona molia ai nei.

O Novema 2022 sa lipotia ai e leoleo, le molia ai o Vaa Brown i le faaoolima i ni tamaiti aoga Sagata Iosefo, ina ua faasalalau se ata video sa pueina ai lea gaioiga.