O le asō, Aso Tofi 8 Iuni 2023, o le a suesueina ai e le Faamasinoga Maualuga le mataupu i le faamavae ai o Sui Fapule e toatolu mai le vaega faaupufai o e Puipuia Aia Tatau a Tagata (HRPP), ina ua fia avea i latou ma sui faipule tutoatasi o le Palemene.
O le Faamasinoga Maualuga o le a tuuina mai ai le tali o le fesili, pe toe fo’i Sui Faipule e fesiligia o latou itumalo e ala lea i palota laiti, pe faatumau ai pea ona fai i latou ma Sui Faipule Tutoasi (Independent MPs).
O le tofa ia Ale Vena Ale mai le itumalo o Faleata 4, Tu’uu Anasii Leota mai le itumalo o Siumu faapea le tofa ia Ma’uu Siaosi Pu’epu’emai mai le itumalo o Vaa-o-Fonoti, o loo latou finauina le lē o gatasi o le Tulafono o Faigapalota, ma lo latou aia tatau e tuua ai se vaega faaupufai ua latou lē toe fia auai ai.
I le toe valaauina o lenei mataupu i luma o lana afioga ia Leiataualesa Daryl Clarke, na ia faailoa ai le tatau lea ona tuuina atu i luma o le Faamasinoga vaega uma o mafuaaga na savavali ese mai ai sui faipule mai le vaega faaupufai sa latou tamomoe ai i le faigapalota tele o Aperila 2021.
O lenei mataupu o loo iai foi le itu a le HRPP, i se avanoa e tali atu ai i ni tuuaiga a sui faipule ua faamavae, e faasaga i le vaega faaupufai.
O loo manino le Tulafono o Faigapalota i ona teuteuga (amendments) lea sa pāsia e le faigamalo talu ai, ua lē mafai ai ona toe suia se vaega faaupufai a se Sui Faipule i totonu o le 5 tausaga o se paeaega.
I le tulafono sa iai, e mafai lava ona faamavae, ae avea ma Sui Faipule Tutoatasi, ae peitai, o nisi o teuteuga sa pasia i le amataga o le 2021, na lē toe talia ai foi lea tulaga.
O saunoaga a Ale Vena Ale ma Tu’uu Anasii Leota i totonu o le Palemene, sa la tuuaia ai lē sa avea ma Taitai a le Itu Agai, le afioga Tuilaepa Sailele Malielegaoi, i lona faia ma le mautinoa o nei suiga ina ia aua aua lava ona toe alu ese se isi mai le vaega faaupufai o le HRPP.
O lenei mataupu na tuuina atu e le Fofoga Fetalai, le afioga Papalii Lio Taeu Masepau i le Faamasinoga e iloilo ai ma aumai le tali.
Peitai o le finau mai a Sui Faipule e toatolu, ua saisaitia o latou aia tatau, talu le tulafono faavaeina a le faigamalo talu ai.
O se faiga na tā’ua e le tofa ia Ale Vena Ale ma le tofa ia Tu’uu Anasii i totonu o le fonotaga a le Palemene, e taofi ai pea le power ma saga faatumauina ai pea le HRPP e taitaia le Malo.
O lenei mau o loo teena malosi e le vaega faaupufai a le HRPP, e tauala mai i le latou loia le afioga ia Fuimaono Sefo Ainuu.
“O le finau mai o le HRPP e fia avea ma itu auai o lenei faamasinoga, ona e tatau ona tali le vaega faaupufai i tuuaiga a Sui Faipule.
O le tamaitai loia ia Muriel Lui o loo tulai mo Sui Faipule e toatolu, ae o le afioga ia Fuimaono Sefo Ainuu o loo tulai mo le HRPP.
O le asō, Aso Tofi 8 Iuni 2023 i le itula e 12 i le aoauli o le a suesueina ai lenei mataupu.
