Aso Lua 9 Oketopa 2024, Apia Samoa. O le Aso Gafua 7 Oketopa 2024 sa faasalalau mai ai e le Ofisa o Leoleo se teineitiiti 17 tausaga o loo sailia.
Sa faasalalauina mai foi e le aiga o Kirita Taalili, e faapea o le si o latou tei, na ave faamalosi e se taavale lanu moana, ao agai atu o ia i le faleoloa, e ui atu i le auala galue o le latou nuu i Leauvaa Uta, i le taeao o le Aso Gafua.

O nisi o le afioaga sa latou molimauina ma ta’u ane i le aiga, sa latou iloa atu se taavale lanu moana sa tu ma talanoa atu ia Kirita.
Sa le nofoa’i le afioga ia Savea Motoa Uesile, o le tuagane o le tina o Kirita, i sana faasalalauga faalauaitele na tuu vave ifo i luga o upega tafailagi, e faailoa mai ai, o si o latou tei o loo masalomia na ave e le taavale lea.

O le aso lava na sosoo ai, poo le Aso Lua 8 Oketopa, sa toe faailoa mai ai e Savea i sana faasalalauga, ua toe maua ane si ona tei.
Saunoa le uncle o Kirita, “O lea ua faamaonia o le taavale lanu moana lava lea sa ou talanoa atu ai, sa ia pikia i le faleoloa lea i gatai si o matou tei, i luma laititi mai lava o le main road..”
Sa tauanau e le ave taaavale le teineitiiti, e faapea o loo iai se fale o se aiga e fia faasino i uta, ma la o ai loa. Peitai, e pei ona faamatalaina e Savea, sa agai atu lenei taavale i uta, ma ui atu ai lava i Aleisa, oo ifo i Leulumoega Tuai, ma agai atu ai lava i Faleatiu.
Saunoa Savea, na toe sau lava le alii lea ma toe tuu mai Kirita i le mea lea sa piki ai lo latou tei. E oo atu latou e tau tuli tuli atu le taavale, ua le maua, atonu sa ui i auala o Tuanai.
Saunoa Savea, o le tagata e uliuli, umi paee, ae fealuai i taavale fou o le ituaiga, o le Nissan Note lanu moana.
“Fai mai lo’u tei o le taavale na agai i Aleisa, ui ifo i Leulumoega Tuai, ma agai atu ai i Faleatiu (se’i tulou le mamalu o afioaga ua taua).”
“Pau le mea lea e iloa e si matou tei, o Faleatiu sa iai, i le po atoa”.
Saunoa Savea, o latou e faafetai i Le Alii ona o lea ua toe maua atu si o latou tei, ae ua faasaoina lona soifua.
Peitai, e pei ona saunoa Savea, o le tulaga i le latou vaavaai atu, ua tele le aafiaga i si o latou tei.

“O le matou lava vaai iai, ua ia faaleaga le olaga o si matou tei..”
“Atonu o lena e tou te silafia se uiga o se tala lea e tau faailoa atu.. Ua aafia lona tino..”
“Ae pau le mea ona o lea ua sau le alii lea, ma tiai mai ae sola..”
Saunoa Savea, o latou o tama o le aiga, ua latou fia maua le alii lea sa ia avea faamalosi lo latou tei ma fai iai ni amioga mataga.

“A le faia se fua i le tagata lea, o le a faaauau pea ona ia faia i fanau teine ma tatou tuafafine.”
Saunoa Savea, o si ona tei sa ave e leoleo i le falemai mo suesuega.
“O loo ave e fai ona siaki ma tulaga uma”.
“E fia momoli faapitoa sa’u meaalofa i le uso lea sa ia avea si matou tei..”
Ua faamaonia mai e le Komesina o Leoleo le afioga ia Auapaau Logoitino Filipo, sa ave faamalosi (kidnap) ma ia faia foi iai ni feusuaiga faamalosi.”
Saunoa Auapaau, o lea ua iloa e le Matagaluega o Leoleo le tagata lea o loo masalomia, ma o loo tausaili nei.


- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025














