Ua soloia e le Faamasinoga Maualuga aiaiga na faatulaga e le Faamasinoga Faaitumalo, ma ua taofia nei le saini a le Sui Faipule i vaiaso taitasi, ma tatala le tapu sa lē mafai ai ona malaga ese mai Samoa le Taitaifono a le Faatuatua i le Atua Samoa ua Tasi.
O le Aso 3 Ianuari 2025, sa molia ai Laaulialemalietoa Leuatea Polataivao Schmidt i moliaga e 10. E tolu moliaga o le ufiufi o le amiotonu, tolu moliaga o le faia o faamatalaga sese, lua moliaga o le lalafo o upu faifai, ae tasi le moliaga o le taumafai e faatino le solitulafono, ma le moliaga o le lalafo o upu faaso’esa i luga o upega faatekolosi.
Sa tuuina mai e le Faamasinoga Faaitumalo aiaiga o le tatala ai i tua o Laauli: (i) e saini i le ofisa o leoleo i Aso Faraile taitasi ae le’i taina le itula e 4 i le afiafi; (ii) taofia pepa malaga, (iii) tapu ona toe faasalalauina i luga o upega tafailagi (social media) e tautalagia le mataupu o loo aafia ai; (iv) faasaina ona fesootai molimau a leoleo mo le mataupu.
O le faaiuga o le vaiaso nei na tuuina mai e le afioga ia Leutele Niavā Mata Tuatagaloa, e soloia ai aiaiga a le Faamasinoga Faaitumalo.
I le faaiuga na fofogaina, ua soloia ai le aiaiga e tapu ona tuua e Laaulialemalietoa Leauatea Schmidt ia laufanua o Samoa.
Ua soloia foi le o saini o le Sui Faipule i le Ofisa o Leoleo i Aso Faraile o vaiaso taitasi.
O se talosaga apili a le taitaifono o le FAST i luma o le Faamasinoga Maualuga, sa finauina e lana loia ia Muriel Lui.
“E leai se itu o le a faapopoleina ai le Faamasinoga mai le malaga ese atu o Laauli ma Samoa nei..”
“O Laauli o se matai Samoa, matai tausi aiga, matai tausi nuu, e iai ona tiute faa Ekalesia, Sui Faipule o le Palemene, o se tamalii faipisinisi foi i Samoa nei..
“E faamautu i Samoa nei ma lona toalua ma lana fanau, ma o se sitiseni Samoa, o lona soifuaga atoa o Samoa nei.”
E oo foi i le saini i le ofisa o leoleo na talosagaina e Muriel Lui, “O taimi e faatino ai faalauiloa a le Vaega Faaupufai e taamilo ai i itumalo eseese i Tumua nei ma Salafai, e ono tuua ai le faamoemoe a le FAST, ae tuliloa mai le taimi ua faatulaga e saini ai i le ofisa o leoleo.”
Na teena malosi e le tamaitai loia ia Leinafo Tamalelagi Strickland o loo tulai mo leoleo.
Saunoa le loia, “Soo se tagata lava ua molia ma tulai i luma o le Faamasinoga e iai lava aiaiga masani, e pei o le saini i le Ofisa o Leoleo ma le tuuina atu lea o pepa malaga, ma tapu ona malaga ese mai Samoa seia ma’ea taualumaga o le faamasinoga..”
I fafo mai o le potu faamasino na saunoa ai Laauli, ” e silia le sefulu malaga sa tatau ona ou malaga ai atunuu mamao I faalavelave faaleaiga ma faamoemoe vaega faaupufai peitai sa saisaitia ona aiaiga sa tuuina mai, ae o le lagona lava o le fiafia ma le faafetai lea ua matala se finagalo le faamasinoga.”
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
