O le solitulafono le tuuina atu o faalauiloa faatosina a se sui tauva ao lei oo i le taimi faatapulaa lea ua tuuina mai e le OEC: Aso 14 Iulai – 24 Aokuso 2025.
Ua faateia ai le toatele i se faasalalauga a le Ofisa o le Komesina o Faigapalota na tuuina mai i le vaiaso nei se faasalalauga a le OEC i lea tulaga.
E tusa ai ma le tulafono o faigapalota (Electoral Act 2019) e tatala le piliota o faalauiloa (campaign period) pe a maea le taimi e lesitala ai sui tauva (nomination period).
O le saunoaga lea a le Komesina o Faigapalota le afioga ia Tuiafelolo Toleafoa Jonh Stanley.
Saunoa Tuiafelolo, “O le Aso 14 Iulai agai le Aso 24 o Aokuso, o le piriota lea ua atofaina mo faalauiloa (campaign period) e aofia ai faalauiloa mo vaega faaupufai ma faalauiloa mo sui tauva, o ni faatalanoaga faapea ma pepa (pamphlets) ma laupapa faasalalau.”
Na faamanino foi e Tuiafelolo, o le campaign period e faatagaina ai faatosina faalauiloa e pei o tomai ma agavaa faapea anavatau ma tulaga e talitonuina e le sui tauva.
Ae lē faatagaina e le tulafono ni faatosina tupe poo mea taumafa poo se isi lava tulaga e tuuina atu i tagata palota.
“O le solitulafono le tulaga lena..”
Ua savali le tolu vaiaso talu ona vaaia faalauiloa o anavatau a vaega faaupufai faapea ata faalauiloa o sui tauva taitasi ua faasalalauina i luga o le facebook.
Ua iai fo’i pepa faasalalau ua faapipii i luma o nisi o faleoloa ma taavale, faapea foi laupapa faailoilo i autafa le auala.
Saunoa le Komesina o Faigapalota ia Tuiafelolo, “I le tulafono o faigapalota e solitulafono vaega na faatinoina e vaega faaupufai o le faalauiloaina o a latou anavatau faapea faasalalauga o faalauiloa o sui tauva.”
O le vaega faaupufai o le HRPP na muamua lava faalauiloa le latou anavatau, ma e 3 vaiaso na tuuina mai ai vaega taitasi o le anavatau lea e iai le COLA ma le PELEGA.
O le amataga o le masina o Iuni na tatala aloaia ai le vaega faaupufai o le Samoa United Party ma faailoa ai foi se aotelega o lana anavatau.
O le masina foi o Iuni na faalauiloa ai le anavatau a le vaega faaupufai o le Samoa Labour Party, e faapea foi le vaega faaupufai o le Tumua ma Pule.
O le Faatuatua i le Atua Samoa ua Tasi, ua folafola e le taitaifono o le Aso 12 Iulai e faalauiloa ai lana anavatau, seia vagana ai faalauiloa a sui tauva lea o loo faasalalauina le taimi nei.
O sui tauva uma e aofia ai ma sui tutoatasi o lea ua molimauina faalauiloa i luga o le social media ae o lea ua faatoa faamanino mai, e le tusa ai ma le tulafono e pei ona saunoa le Komesina o Faigapalota.
O le tuualalo a le ofisa o faigapalota e tauala mai i le Komesina – ia tautuana le tulafono e ao ona mulimulita’ia ma usitaia e sui tauva ma vaega faaupufai.
“O le solia o tulafono o faigapalota e ono oo ai se mataupu i luma o le faamasinoga.”
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
