Sola ese mai Mulinuu se Pagota sa aumai i Tanumalala e Tula’i i Luma o le Faamasinoga

"sa lē tatau ona tula'i mai lea tulaga, ua faatamala tele Malu o le Malo sa tiute i le fale faamasino."

0
815

O loo faagasolo nei se suesuega a leoleo pe faapefea ona sola ese mai se pagota mai le Fale Faamasino i Mulinuu, ina ua taunuu le pasi sa aumai ai i latou mai Tanumalala.

Ua faailoa se finagalo a le Komesina o Leoleo, le afioga ia Auapaau Logoitino Filipo, i le faatamala o Malu o le Malo faapea Leoleo mai le Falepuipui i Tanumalala, ina ua tula’i mai se gaioiga na sola ese mai ai le alii o Daniel Vailopa.

O lenei pagota o loo molia i le talepe fale, gaoi ma le toso teine. Ae ua toe molia fo’i nei ina ua sola ese mai le pasi sa aumai ai i latou uma mai Tanumalala, ma le faamoemoe e tula’i i luma o le Faamasinoga.

Police Commissioner Auapaau Logoitino Filipo.

Saunoa Auapaau, “sa lē tatau ona tula’i mai lea tulaga, ua faatamala tele Malu o le Malo sa tiute i le fale faamasino.”

O le taeao lava lea na sola ai le alii o Daniel Vailopa, sa toe maua ane ai e leoleo ina ua vave ona tali atu nisi o Malu o le Malo mai le Ofisa Autu, e fesoasoani i le tau sailia o le pagota.

O loo faagasolo nei suesuega a le Matagaluega pe na faapefea ona sao le gaioiga a Vailopa lea na sola ese mai ai i Mulinuu ina ua taunuu le pasi sa auina atu ai i latou o loo taofia i le toese.