Faa-Samoa

Tapena e Alii ma Faipule o Matautu Falealili ni Taiala e Tafiesea ai Sauaga Faasaga i Tina ma Tamaitai

July 18, 2022

2658

O le vaiaso nei na amatamea ai Alii ma Faipule o Matautu Falealili, e soalaupule ni taiala talafeagai mo le afioaga, e tafiesea ai sauaga fa’asaga i tina ma tamaitai.

E silia ma le 50 tamalii ma aumaga na auai i lea soalaupulega, na faatautaia mo aso e lua e pei ona fuafuaina i le Polakalame a le Malo i lana faigapaaga ma le Toomaga mo e Puapuagatia.

O le fa’anaunauga, ia taimua alii i le tafiesea o sauaga ua aafia ai tina ma tamaitai.

O se upu na tomatauina ai le soalaupulega, na saunoa i ai le Susuga i le A’oao Fesoasoani ia Pi Nofoaga Ieremia; i lana faamanatu i le loto faamagalo peā osofaia e le ita le saogalemu o aiga.

Na saunoa le alii taua o le afioaga, le Afioga Tupuola Tusa Misi, “o le meaalofa a le Atua o le mafaufau, ma e tatau ona fa’aaoga lelei le mafaufau o le tagata i le siosiomaga o loo ola ai.”

O lenei saunoaga ua poupou ai le sini o le Taiala ma le fa’alauiloa a Alii ma Faipule o le afioaga, ua faapea mai “O Matautu o se Aiga Fiafia.”

O le taua o mafaufauga agai i itu lelei e moomia ona ausia, ua atagia ai le taimua a tamalii mai Matautu Falealili, ma le filemu.

E pei ona auga i ai le faamanatu a le Susuga i le Aoao Fesoasoani, i le loto faamagalo.

E fa’aleoia ai e le Toomaga le faafetai i le tofā tatala a Alii ma Faipule a Matautu Falealili, na tuuavanoa ai i le vasega o aumaga, latou te faasoa i le soalaupulega a tamalii ma failauga o le afioaga.

Saunoa le Afioga i le Peresetene a le Toomaga, Siliniu Lina Chang, “ua avea le Polokalame e tafiesea ai sauaga faasaga i tina ma tamaitai, ua faamautu ai foi ma le auaiga a le Toomaga ma afioaga o Matautu Falealili. Ua fa’amalo le lagolagosua i le tatou galuega fai fa’atasi.”

“E fa’amauina foi le agaga fa’afetai a le Fa’alapotopotoga i le Malo o Samoa mo le fa’atuatuaina o le Toomaga i Polokalame fa’aauau aua lava le tafiesea o sauaga faasaga i tina ma tamaitai.”