E 323 moliaga faasaga i le tamaitai o Seira Malifa lea sa avea ma tagata faigaluega o le faletupe a le ANZ.
O le vaiaso na sei mavae atu nei sa tuuina mai ai ni moliaga e oo atu i le $1.3 miliona tala, peitai, na talosaga le itu a leoleo mo se avanoa e toe tolopo ai, ae sei faamautu uma mai moliaga.
Ina ua toe tulai Seira Malifa i luma o le Alii Faamasino ia Fepuleai Ameperosa Roma i le taeao o le Aso Gafua, sa fofogaina ai e le Loia Sili Lagolago le aofai o moliaga e 323 ma le tino i tupe e lata i le $1.5 miliona tala.
O loo tuuaia lē ua molia e faapea o le tausaga 2018 na amata ai ona faatino nei faigafaasolitulafono, seia oo mai i le 2022.
E lima tausaga ae faatoa iloa ai e le ANZ Bank o loo faia e Seira ni faiga faasolitulafono ao avea ma tagata faigaluega. O le 2022 na lipotia ai e le faletupe i le Matagaluega o Leoleo ma faasolo ai loa suesuega.
Ina ua faatoa tulai Seira Malifa i luma o le Faamasinoga ia Ianuari 2023, e na o le $80,000 le tinoitupe sa tuuaia ai o ia. Sa ia ioeina moliaga faasaga ia te ia. O Mati 2023 sa fofogaina ai e le itu a leoleo, o loo iai nisi moliaga faaopopo.
E lei tuuina mai se tali a lē ua molia ina ua faamautu mai le aofai o moliaga e 323 ma le seleni e lata i le $1.5 miliona tala.
(4660)
