Ua toe te’ena nei e le alii 20 tausaga le matua mai Leone, ia Viliamu Junior Viliamu le moliaga o le faomeatotino matuia (aggravated robbery) lea sa ia ioeina i le tolu tausaga talu ai.
Sa tolaulauina lea mataupu i luma o le tamaita’i Fa’amasino ia Tafaoimalo Leilani Tuala-Warren i le Aso Lulu o le vaiaso ua mavae. Sa molia faatasi atu Viliamu ma le isi foi alii talavou ia Pese Paulo, o loo tuli nei lona faasalaga i Tanumalala.
O lē na aafia i lenei mataupu o se alii papalagi 22 tausaga mai Victoria i Ausetalia. O le tuuaiga, o le aso 13 o Setema 2017 i Matautu o sa faaoolima ma faoina ai e nisi meatotino a le o lo’o tagi.
O le mau a lē ua aafia, sa latou eva ma nisi o ana uo e toalua i lea lava po i le bar o le Marina. Ina ua lata ina tapuni lea fale sa taumafai ai le na aafia ma ana uo e pu’e se taxi e agai atu ai i le faletalimalo o le Sheraton sa nonofo ai. Ua iu ina fiu e faatali se taxi ma amata ai loa ona savavali i latou ia.
O le o’o atu o le savaliga i luma o le fale kalapu o le X-Club na vaaia ai se nofonofoga a ni alii se toaono. O le tala a le o loo aafia e faapea na oo mai loa i lea faalapotopotoga ae tu’i mai loa ia i tua e se tasi o le toaono lea, ma pau loa i lalo.
O le tuuaiga e faapea o lea lava taimi na tago atu ai loa le o loo tulai i lea mataupu, ma aveese mai le telefoni a le o loo aafia.
E tu a’e i luga le alii papalagi o loo tagi i lenei mataupu ae ua toeitiiti oo atu i le auala laupapa i Vaisigano le o loo tulai nei, le alii o Viliamu, ma o loo tuli atu e sikulati o le falekalapu lea. Peitai e lei maua.
O le ua aafia ua toe foi i Ausetalia, ae o le alii o Viliamu, o lea sa valaauina lana mataupu i le tausaga lava lea 2017 faatasi ai ma Pese Paulo, ma sā ioeina e Viliamu ona moliaga i lea taimi, ma faatulaga mai ai loa e le faamasinoga le aso e toe tolaulauina ai mo se faatulagaga o lana faasalaga (sentencing).
Peitai o le vaaiga mulimuli lava lena a le faamasinoga ia Viliamu. O le toe tulai ai o Viliamu i le vaiaso ua mavae atu nei e mafua ona ua toe maua mai e leoleo ma o loo faasaga i se solitulafono o loo aafia ai fesootaiga tau feusuaiga (sexual violation).
E molia atu la i lea moliaga ae maua ai loa e tolu faila o isi foi moliaga o loo taatitia mai i le faamasinoga, atoa ai ma tusi saisai.
O le fuafuaga a le faamasinoga ua faia loa ina ia faagasolo muamua moliaga ia sa tuua mai e iai le moliaga lea o le faomea matuia.
O loo ua toe teena nei e lea alii le moliaga ma ia faapea mai e lē o ia na faaoolima i le papalagi ma fao lana telefoni ae o Pese Paulo sa faatinoina lea solitulafono lea ua tuli nei lona fo’i faasalaga i nisi o moliaga faapea foi.
O le uluai tolaulauga o lea mataupu i le Faamasinoga Maualuga o loo taua, sa tulai ai le tamaitai loia ia Unasa Iuni Sapolu mo ia alii e toalua, ae o le solitulafono lea ua maua ai Viliamu o loo ua tulai ai le alii loia ia Afa Lesa.
O lea moliaga o loo ua faatulaga mai e le faamasinoga se aso e fofoga ai i le talosaga tatala ai i tua (bail hearing) ml Viliamu Junior Viliamu, lea sa taofia mai e leoelo, amata mai ia Ianuari o le tausaga nei.
(5)
