E silia ma le 75 maliu mai le faamai o le misela sa mafai ona fesoasoani iai le Toomaga mo e Puapuagatia (SVSG) ma o le tele o i latou o le fanau iti e lei faaooina atu e latou aiga i le falemai.
Na faailoa mai e le tamaitai faatonu o le Toomaga mo e Puapuagatia, Siliniu Lina Chang le tele o meaalofa sa faaoo atu e le mamalu o le atunuu faapea faalapotopotoga ua mafai ai e le Toomaga ona fesoasoani atu i le tele o aiga sa mafatia ma maliliu fanau i le misela.
“E lagona le agaaga faagaeetia ona o le maoae o le alofa tulai o o tatou tagata”.
O se tasi o nei faalapotopotoga o le The Alofa Charitable Trust (TACT) mai Aukilani Niu Sila sa faaoo mai le latou fesoasoani i le polokalame faaauau a le Samoa Victim Support Group e $2000 tala.
O le Alofa Charitable Trust poo le TACT o se tasi lenei o paaga a le Toomaga mo e Puapuagatia, ma o loo mafai foi e lea faalapotopotoga ona auauna atu i tagata Samoa o loo aumai ai i Aukilani Niu Sila.
Sa fesoota’i mai se tasi o faatonu o le faalapotopotoga ia Levaoatumaana Aati Schuster i le SVSG e fia faaoo mai si a latou fesoasoani e lagolagosua ai i le galuega o loo feagai ma le Toomaga.
O se tasi polokalame o loo fai paaga ai le TACT ma le SVSG o le faatupeina lea o pili aoga mo fanau o loo faatau solo oloa i le taulaga. O lea polokalame ua faaigoaina o le SVSG’s Hot Soup Skill Building Programme ma o loo taumafai ai nei le faafitauli o loo maitauina i Apia, i le tele o le fanau i lalo mai le 18 tausaga o loo feoai e faatau tau oloa eseese ae le toe aooga.
(11)
