Tusia: Taunuuga Toatasi
O le ‘ave pea o le fa’amuamua a le Mālō i le soifua mālōlōina lelei o le atunu’u, o lea ua auina mai ai se tasi o fa’ata fou (C.T. Scan) e fa’aāoga mo gasegase e afea le falema’i mo togafitiga.
E silia ma le $4 miliona le tau o lea masini fa’ata fou (CT scan) mai Niu Sila ma sa fa’atupe e le Fa’alapotopotoga o Taui o Fa’alavelave Fa’afuase’i (A.C.C.).
O le fa’aāogaina o lea fa’ata fou o le a fa’asaoina ai seleni a le Mālō, sa masani ona fa’aalu e ‘ave ai o tatou tagata e fai o latou fa’ata i Niu Sila ma Amerika Samoa.
O le vaiaso lenei sa fa’atautaia ai le sauniga fa’ale-Mālō e tau’ā’aoina ai lea masini i le Matāgaluega o le Soifua Mālōlōina mo lona fa’aāogaina.
I le saunoaga a le Minisitā o le Fa’alapotopotoga o Taui o Fa’alavelave Fa’afuase’i, afioga iā Leaitnu’u Wayne So’oialo, sa ia saunoa ai i le tāua tele o lea masini i le sā’ilia o gasegase tugā i le atunu’u.
“Mo le silafia e Samoa, tasi lenei auaunaga ua leva ona fa’atino, o le ‘ave i fafo o tatou tagata ona o le fia maua o se fesoasoani auā le fa’amoemoe i le fa’ata C.T. Scanner lea.
“E tāua tele le soifua o tatou tagata i le tulaga lea.
“O le C.T. Scan e maua ai ata manino o itutino o le tagata mai lou ao (tulou) se’ia o’o i musele nini’i o lou tino, ina ia vave ona silafia e foma’i le gasegase ma fa’atino loa togafitiga ma vailā’au ma fuālā’au e fetaui auā le toe fa’afo’isia o le malosi i lē o lo’o ma’i.
“O le manulautī a le tatou Mālō, ia fa’aitiitia le so’ona fe’avea’i o tatou tagata i atunu’u tuāoi auā se fofō talafeagai mo nei togafitiga.
“O le tatalo a le tatou Mālō, ia atoatoa uma i latou e fa’atinoina ia galuega.
“Auā e leai se āoga e aumai ai ia masini ae leai se isi e mafai ona fa’agaioiina.”
Na tu’uina atu ai fo’i ma le talosaga a le afioga i le Minisitā i le Matāgaluega o le Soifua Mālōlōina aemaise o le aufaigaluega o le a fa’aāogaina lenei masini.
“E talosagaina le Matāgaluega o le Soifua Mālōlōina, fa’aāoga ma le atamai lenei masini fou aemaise lava i le aufaigaluega ua mae’a a’oa’oina ma ua i ai le tomai ma le agava’a e fa’aāoga ai lenei masini taugatā auā se lumana’i manuia o Samoa.
Na momoli le agaga fa’afetai a le afioga i le Minisitā o le Matāgaluega o le Soifua Mālōlōina iā Valasi Luapitofanua To’ogamaga Tafito Selesele i le A.C.C. e tusa o le fa’atupeina o lenei masini fa’apitoa.
“O le ulua’i C.T. Scan na aumai i le 2015, ae ua lē toe fa’aāogaina ona ua i ai nisi o vaega ua fa’aletonu.
“E ono masina na fa’aāoga ai lea masini ae fa’aletonu loa.
“O le vaega tonu lava lea na talosaga i ai le Mālō ina ua matou fa’afoeina le sa o Samoa, o le aumai lea o se C.T. Scan fou fa’atasi ai ma totoga o le masini tuai sa fa’aletonu.
“E tatau ona toe fa’aleleia totoga o le masini tuai, ona fa’aleoleo lea e tua i ai le masini fou lenei pe a fa’aletonu i le lumana’i”.
Pu’e Ata: M.O.H.
(33)
