Silia ma le 160 Moliaga: Tolopo le Mataupu a Sam ao Tālia le Lipoti o le Scan, ma Valaau Faatasi ai ma le Sui Faipule o Salega I

0
563

E 167 moliaga fasaga ia Samuelu Sua, ae 34 moliaga mo lona toalua o Sivai Kepi.

Ua talosaga le itu leoleo e tauala mai le tamaitai loia ia Leinafo Tamalelagi Strickland, ina ia toe tolopo le mataupu e pei ona tulai ai Samuelu Asueru Sua, Sivai Kepi, ma Lise Marie Schmidt.

O le talosaga a le tamaitai loia, seia valaau faatasi le mataupu a Sam i le vaiaso fou ma le Sui Faipule o Salega, Fepuleai Faimata Sua.

Saunoa Leinafo i le Faamasinoga, e fesootai mataupu nei, ma o se avanoa foi e faamautu ai moliaga a le itu leoleo.

E le’i teena e le alii loia o loo tulai mo Samuelu, Lagaaia Fetu Lagaaia le talosaga a le itu a leoleo.

Ua faailoa e le tamaitai Faamasino, le afioga iā Talasa Atoa Saaga, “Ua talia e le Faamasinoga le talosaga a le itu a leoleo ae o se itu lelei foi, ae se’i i faanumera moliaga a le itu a leoleo ma taulimaina e le Faamasinoga le lipoti o le fa’ata poo le CT scan a Samuelu.

Saunoa le Faamasino e faailoa, e le’i fai sana faaiuga e tusa ma le talosaga a Samuelu mo se avanoa e tatala ai o ia i tua e talia ai taualumaga o lenei mataupu (bail application) ona e le’i tuuina atu lava i le Faamasinoga le CT scan lea sa talosagaina e le loia a Sam.

Ae ui o lea ua iai ofisa faasalalau ua latou lipotia, ua tetee e le Faamasinoga i le talosaga a Sam e tatala ai o ia i tua (bail). Peitai o le sa’o o le mataupu, o loo tolopoina le tuuina mai o le faaiuga a le Faamasinoga ona e lei tuuina atu le lipoti o le scan.

O le talosaga a Lagaaia e tatala ai Sam i tua, sa ia tā’ua i le vaiaso ua te’a, e moomia ai se lipoti o se faata poo se CT scan a Samuelu. Ua maea ona faatino lena scan, ae le’i oo atu lava le lipoti i le faamasinoga.

Ua poloaiina e le Faamasino le alii loia ia Lagaaia, e tatau ona oo atu i le Aso Faraile nei, ua taulimaina e le faamasinoga le lipoti o le fa’ata a Samuelu.

O loo faaauau pea ona nofo taofia Samuelu ma Sivai i lalo o le vaavaiga a leoleo e tālia ai le Aso Lua 27 Fepuari i le vaiaso fou, lea e toe fofogaina ai lenei mataupu.

O le a tulai ai foi ma le alii Sui Faipule o Salega 1 i lea aso e fofogaina faatasi moliaga ma Samuelu.

O loo molia Samuelu i lona faia o faamatalaga sese ua tauleagaina ai nisi o le mamalu o le atunuu. O loo molia foi i le taumafai e faasese le faatinoina o galuega a leoleo e ala lea i le molimau pepelo.

O moliaga foi na o loo feagai ma le Sui Faipule a Sagaga 1 – conspiracy to defeat justice and fabricating evidence.