E 167 le aofai o pagota mai falepuipui e tolu o Samoa, o loo ua maua le avanoa e fai kerisimasi ai tua i aiga, ma toe foi i le Aso Gafua.
O lea fainumera sa faamaonia mai e le Sui Komesina o Leoleo le afioga ia Papalii Monalisa Tiai-Keti, ina ua fesiligia e le Samoa Global News.
Ua maua e i latou le faamanuiaga e fai Kerisimasi ai tua i aiga, ma saunoa foi Papalii, “O lea fuainumera e 167, e to’a 8 tamaitai ae 159 alii, ae o lea fuainumera e aofia ai ma pagota mai Tanumalala, Oloamanu ma Vai’aata i Savaii.”
O le taeao o le Aso Toonai na tuua ai e i latou le nofoaga o loo tuli ai a latou faasalaga, ma le faamoemoe e toe foi ane i totonu i le Aso Gafua.
Sa tā’ua foi e Papalii, ua maea ona faailoa iai latou uma nei le Pulega o le falepuipui le tāua o le faa’aoga tatau o le avanoa, ma ia tausisia tulafono ma aiaiga ina ia aua nei aafia i ni soligatulafono ao agai mai e fai aso fiafia ma aiga.”
O nisi o le mamalu o le atunuu, sa latou faailoa mai se popolega i le oo mai ai lea i tua o pagota, ona o se masalosaloga o taimi pito sili ia ona faaeteete gata i le tulai mai o soligatulafono tau talepe fale ma le gaoi.
O le vaiaso nei sa maua ai e le Faiaoga o le Taitoafitu, Muliagatele Brian Lima, se tamaititi sa ia osofaia lona fale. Saunoa Muliagatele o le te’a o le 11 i le po o le Aso Tofi sa osofaia ai lona maota i Letogo. Na oo atu alii Malu o le Malo ma aveese mai lea taulealea.
Ua fautuaina foi e Muliagatele le tupulaga talavou ina ia mamao mai lea soligatulafono e pei ua fai ma masani i tupulaga talavou i taimi o aso malolo ma aso o fiafiaga, e oa ai e taulamalama fale o nai aiga.
I le itu tau palola na saunoa foi le Sui Komesina o Leoleo e 18 le aofai o pagota sa faamanuiaina i le palola i le amataga o le masina nei.
“O i latou ia e toa 18 ua uma foi ona manino aiaiga e ao ona tausisia, e faatāua ai le ‘alo’alo ese mai le ono aafia i nisi soligatulafono.”
O i latou uma ua magalo i le palola, ua tele tausaga o aumai i nofoaga o le falepuipui mo le tuliina o faasalaga ae ua maitauina e le pulega le telē o le suiga iai latou, o loo faamaonia mai i ā latou faamaumauga.
