SIlia ma le $100,000 Tala le Tali a Amerika Samoa i Faaaloaloga o le Feiloaiga

0
2190

E silia ma le $100,000 tala Samoa poo le USD$40,000 le seleni sa tali mai ai Amerika Samoa ina ua fetāliai faaaloaloga e faafeiloai ai faigamalo e lua i talanoaga ua faaigoaina o le Atoa o Samoa.

Sa malaga mai le afioga i le Kovana o Amerika Samoa Lemanu Palepoi Sialega Mauga faapea le tele o faauluuluga o Matagaluega o le Malo mo le feiloaiga i le va o Samoa e lua.

I le ma’ea ai ona saunoa le afioga i le Kovana, ma tali faitau foi le afioga i le Palemia Hon Fiame Naomi Mataafa e uiga i le tāua o lea faamoemoe; ona alo atu ai loa lea o faigamalo e lua i faa’aloaloga.

Sa faatino le faaaganuu i faatamalii, o sua atoa ai ma tofā a le Kovana ma le aumalaga.

Sa faaiu upu a le Sui Fofoga fetalai, le afioga ia Auapaau Mulipola, i le momoliina o le faa’oso mo le aumalaga.

E 20 pusa i’a, 20 pusa sosisi e gaosia i Samoa nei, 20 taga talo, ma le 10 manu papalagi.

Na faaiu upu a Auapaau, i le faapea mai o le a leai se seleni o le faaoso, ona e le taitai fetaui le tupe Samoa pe’a faatusatusa atu i le tupe Amerika (2.6 – 2.8)

Na tali faitau le tootoo, le fetalaiga ia Tauese mai Amerika Samoa ma faafetaia le Malo mo faaaloaloga.

Na tomua upu a Tauese e faapea, “Auapaau, o lea sa ou maitau ua see lou sā ae ua galo ia oe le taitai o le sauniga..”

“O le mea lea, o le a ou amata iai.. lau Susuga i le Taitai o le Sauniga le Akiepikopo Alapati Mataeliga, lau teutusi lea e $10,000 US Dollars.”

Sa faasolo le faaaloalo a Amerika Samoa, ma tuuina mai ai le USD$7,000 (ST$19k) mo le afioga i le Palemia Hon Fiame Naomi Mata’afa.

O le Fofoga Fetalai o le Maota Fono, le afioga Papalii Lio Taeu Masepau e USD$5,000 (ST$13k) ae o le afioga i le Sui Palemia ia Tuala Tevaga Ponifasio e USD$4000 (ST$11k)

Sa tai USD$2,000 Amerika Minisita e toa ono sa auai ai.

O le afioga ia Toelupe Poumulinuku Onesemo e USD$2,000. O le Minisita o Soifua Maloloina ia Valasi Tafito Selesele e USD $2,000. Faapea foi ma le afioga ia Leatinuu Wayne Sooialo ma Toesulusulu Cedric Schuster.

O le afioga ia Matamua Vasati Pulufana e USD $2,000 faapea Lefau Faulalo Harry Schuster e USD$2,000.

Mo le tootoo o le aso, sa faamanuiaina i le USD $1,000 le afioga ia Auapaau.

Sa lafoia foi le afioga i le Komesina o le FESA Tanuvasa Petone Mauga, o le Failautusi o le Fono, faapea le afioga ia Agafili Tomaimano Shem Leo, i le tai USD$500 ona sa la tuualalo i le tootoo.

I le saunoaga a le Kovana o Amerika Samoa, na ia faailo ai mataupu sa talanoaina i le va o Samoa e Lua, e aofia ai:

* talanoaina i le itu tau tamaoaiga faasoa ma oloa fausia

* faamalosia o pisinisi faalotoifale

* fefaatauaiga fua o faaeleeleaga ma faigafaiva

* le itu tau soifua maloloina ia faataua le soifua ma ola ma foia faama’i feaveai

* o le itu tau aoaoga

* o auala femagalaiga aua le malu puipuia ma le saogalemu

* o tulaga i ofisa femagalaiga, mo tulaga o iai pemita

* puipuiga o aiga ma fanau, ae maise i tulaga o fualaau faasaina

* faamautu auala o fesootaiga

Sa faaiu nei fonotaga i le va o atunuu e lua i le Aso Faraile ma toe taliu ai le afioga i le Kovana ma le mamalu o le aumalaga.

I le maea ai o nei feiloaiga sa tāua ai e le Peresitene o le Asosi Fai Pisinisi Tumaoti, le Chamber of Commerce, ua faafiafiaina i latou i nisi o faaiuga sa faailoaina mai.

Saunoa Seulupe Michelle Macdonald, o le tatalaina mai o avanoa mo oloa e gaosi i Samoa nei e avatu i Amerika Samoa e pei o fuamoa ma manu fasi (eggs and meat) o se fesoasoani tele lea mo le tamaoaiga o Samoa.