E $2 miliona tala ua toe faaopoopo e le Malo mo le faatupeina o le polokalame o gasegase e auina atu i atunuu mamao e pei o Niu Sila ma Initia mo togafitiga faapitoa e lē mafai ona faatino i Samoa nei.
E $12 miliona tala na faatulaga e le Malo i le Tala Faatatau Autū o le Tupe 2025/2026 e faatupe ai lea polokalame.
Peitai, na faailoa e le afioga i le Alii Palemia le siitaga e atagia ai le faamuamua ma le faatāua o lenei auaunaga mo tagatanuu Samoa.
“Ua pāsia e le Malo le isi $2 miliona faaopoopo mo togafitiga a le Soifua Maloloina ina ua mae‘a le $10 ma ona tupu miliona sa faataatia i lalo o le tatou tala o le tupe lea ua tau faauma nei.
“O ī e iloa ai le telē o le tupe faaalu a le tatou Malo mo le Soifua Maloloina e ala i le auina atu o tagata mo togafitiga i atunuu mamao.”
Saunoa le Alii Palemia, e lē o māmā le silasila a le Malo i lea tulaga, aemaise i le ave o le faamuamua i soifua o le mamalu o le atunuu.
“E iai le faamoemoe e galulue punoua‘i pea le Matagaluega i auala e sili ona talafeagai mo le puipuia nai lo le tau togafitia.”
Na ia faailoa foi ua pāsia aloaia e le Kapeneta le isi tinoitupe e faaauau ai pea le polokalame seia mae‘a lenei tausaga faaletupe, pe afai e toe toatele nisi gasegase e manaomia ona auina atu i fafo.
Saunoa foi le taitai o le atunuu, ua silasila le Malo i nisi o suiga tetele mo lea polokalame, ma o loo galulue ai nei le Matagaluega o le Soifua Maloloina.
“O le galuega ua faatino e le Matagaluega i totonu o nei masina e valu talu ona tulai mai le faigamalo, o loo tapena ai nisi o suiga tetele e aofia ai le aumaia o fomai, masini fou, ma le fausia o nisi falemai fou mo togafitiga o tatou tagata i totonu lava o le atunuu.
“Ua maitauina foi, o nisi tagata ua lē mafai ona auina atu i fafo ae ua omai fomai e togafitia i latou i inei.
“O taotoga o le fatu, puta, ate ma fatuga‘o, o loo mafai nei ona faatino i totonu o lo tatou atunuu.”
I le masina lava ia o Aperila, e to‘a 20 gasegase na pasia e le Kapeneta e auina atu i Niu Sila ma Initia mo togafitiga.
- Faagasolo Suesuega a Leoleo i le Maliu o se Alii i le Vili Ma’a i Alafua - August 31, 2026
- Siliga Diana Roma Sworn-In as Acting Judge of Samoa’s Supreme Court - August 12, 2026
- “Ou te lē Mana’o e Toe Aafia ai se Isi” – Lapata’iga a se Tinā na Se’etia - August 7, 2026
