Ua faamaonia mai e le Ofisa Sili o le Malosiaga Faaeletise le EPC, se fuafuaga e siitia ai le tau o le iunite mo Pisinisi Tumaoti (private sector), faapea Matagaluega ma Faalapotopotoga Tumaoti a le Malo.
Sa fesiligia le Ofisa Sili o le Malosiaga Faaeletise le afioga Faumui Tauiliili Iese Toimoana, ina ua faaalia ni atugaluga a le mamalu o le atunuu i se faatatau o le a siita ai le tau o le iunite o le cashpower i Samoa.
Ae peitai, i se faatalatalanoaga ma le Ofisa Sili na ia saunoa ai, “Na o Matagaluega a le Malo, Kamupani ma Faalapotopotoga Tumaoti, lea o le a aveesea le 20% lea sa faapa’ū ai i lalo le tau o le iunite.”
Ina ua tula’i mai le faigamalo fou, sa faapa’ū ai i le 20% le tau o le eletise, o le vai, faapea ma faigamalaga i le va o Upolu ma Savaii. O se faaaliga na tuuina atu e le FAST a o alo atu le atunuu i faigapalota.
Sa saunoa manino Faumui, o le fuafuaga o loo fai nei, e le o aafia ai maota ma laoa o aiga taitasi.
“Mo le mamalu lautele lava ia o le atunuu, o loo tumau pea le 20% o loo pa’ū maualalo ai le tau o le iunite e pei ona iai i le taimi nei, ma e leai se tulaga o le a faapopoleina ai le atunuu.”
Saunoa le Ofisa Sili, o le taimi o le faama’i a le koviti lea na aafia ai Samoa ma le lalolagi, sa pa’ū maualalo ai le tamaoaiga.
“O le mafuaaga tonu lena na faapa’u ai i lalo le tau o le iunite e fesoasoani ma faamama avega ai i le atunuu.”
Peitai o le saunoaga a Faumui, sa aafia ai foi ma tupe maua a le EPC i lea taimi. Ae sa faamuamua le faamama avega i le atunuu, lea sa faatino ai lava le paū o le tau o le eletise i le 20 pasene.
“O le seleni a le Matagaluega sa faapolopolo ma fa’i fa’i mai e fa’aaogaina mo le faatinoga o le galuega ma manaoga a le matagaluega.”
O le taimi nei o loo i luma o le Komiti Faapalemene o Galuega ma Atinae Tetele a le Malo, se talosaga a le EPC mo galuega o loo fia faaleleia ma faatino, ae o loo to’alia le itu tau tupe maua.
O lea la ua iai nei se fuafuaga e siitia ai Matagaluega a le Malo faapea ma Pisinisi Tumaoti, i le toe aveesea o le 20% lea sa faapa’ū.
