Ua talia e le Faamasinoga Maualuga le talosaga a le tamaitai loia ia Muriel Lui, e savali ese mai le avea o ia ma loia mo King Faipopo poo Malele Paulo.
Ae ua saunoa Malele Paulo, o ia na te le faamoemoeina pe talitonuina ni loia Samoa. Ae o loo faagasolo lana GoFund Me page, e sue ai se tupe e aumai ai sana loia mai Niu Sila.
O King Faipopo sa faamaonia le solitulafono o le taupulepule e faaoo le oti i lē sa avea ma Palemia faapea lē sa avea ma Komesina o Leoleo. E oo mai i le asō e lei tuuina mai se faasalaga mo i laua ma Lema’i Sione lea sa molia faatasi. Ona o loo tālia e le Faamasinoga Maualuga se tuuina atu o se loia e tu mo King Faipopo.
Na muamua lava ona faamuta faafuasei le auaunaga a le alii loia ia Quentin Sauaga sa ia tulai mo King Faipopo, ina ua maea le faamasinoga sa faamaonia ai ona moliaga.
Ua faitau masina nei o tālia pea e le Faamasinoga se faamautu atu e Malele Paulo o sana loia fou.
O le tamaitai o Murial Lui, sa tofia atu i lalo o le polokalame a le Malo e totogi ai loia mo ē e le gafatia ona totogi se loia.
Peitai, ina ua valaauina o lenei mataupu , e le’i mafai ona faailoa mai e le tamaitai loia le mafuaga i lona savali ese.
Ae o se finagalo a Malele Paulo na faailoa i totonu o le Faamasinoga, sa ia tuuaia ai le tamaitai loia ma fai mai o ia na te le talitonuina loia Samoa.
O le tuuaiga a Malele Paulo sa ia faaleo i luma o le Faamasinoga Maualuga, e leai se la fesootaiga lelei ma lana loia, ae ua taumafai Muriel Lui e faasaini o ia ae o lana mau, e lei faamalamalamaina atu o ia vaega.
Saunoa Paulo “Na faatino la’u ‘Go Fund Me’ e saili ai sa’u loia mai fafo, na ou feso’otai mai ia Papalii le CEO o le Matagaluega ae saunoa Papalii, o le a avatu ia te oe le best counsel e totogi e le Malo (legal aid) ae o lea e le faamalieina a’u e le loia.”
Na faauilavea le Faamasino Sinia o le Faamasinoga Maualuga, le afioga ia Vui Clarence Nelson.
“Malele e maua atu i lau faamatalaga e te manao i sau loia mai fafo”.
Na tali Malele, Ioe sa ia mana’o i sana loia mai fafo ona ua ia le talitonuina loia i Samoa nei.
Sa faailoa e le afioga ia Vui ia Malele o le tologa mulimuli lea o lana mataupu.
Pe maua sana loia mai fafo pe leai foi se loia, o le a lau pea le faaiuga a le faamasinoga i le Aso 28 o le masina nei.
