SAUNOAGA FAAPITOA A LE PALEMIA, SUSUGA TUILAEPA LUPESOLIAI SAILELE MALIELEGAOI I LE SAUNIGA MO AU-FAIGALUEGA A LE PULEGA O LE TINEIMU UA FAAUUINA MAI AOAOGA AMATA
(12 Novema 2020)
Lau Susuga i le Taitai o le Sauniga, Susuga Opeta Ioapo
Afioga Minisita o le Kapeneta
Afifio Sui o le Palemene
Afifio Sui o Malo mai Fafo
Faauluuluga o Matagaluega a le Malo ma Faalapotopotoga Tumaoti
Paia maualuga i Aiga, Uo ma e masanni faapea e ua potopoto e molimauina lenei aso faapitoa
O lea ua mae’a ona sufi le lagi ma ua fa’aifo manū o le Malietoa aua Samoa. Ua ē fa’asau foi i le paepae ma le Tunofo aua le a’ao se’e ma le a’ao ulufia i lau susuga i le taitai o le sauniga.
Ua paū foi le mapu’e o uluulu galu ma peau fafati o le taitaeao. Ae tainane le pa na usi ma le malu taue’e o le taeao na lupe ma le aso na atofa.
O lenei aso ma le fa’amoemoe, o se taeao fou ma o se matati’a foi ua mafai ona ausia e le Pulega i lenei tausaga ua lamalama faaiu. E moni ai le upu o le Tusi, “O le fa’amoemoe ua taunuu, o le laau o le ola lea”.
I le 11 vaiaso ua tuanai, sa amata ai le aoga a alii ma tamaitai tineimu, ma e 31 le aofai sa iai. O i latou foi ia ua mafai ona fa’amae’aina lenei fa’amoemoe. E 9 tamaitai ae 22 alii, ma o se agaga fiafia ia te au ona o se taimi muamua lenei i le talafaasolopito o le Pulega o Tineimu ma Fa’alavelave Tutupu Fa’afuase’i ua la’asia ai e le itupa o tamaitai le silia ma le 10% o le vasega faau’u.
Ua le toe po malaē i lenei vaitau i le fa’atuputupulaia pea o fa’alavelave tutupu fa’afuase’i, o suiga o le Tau ma le tele o fa’ama’i eseese ua aafia ai le lalolagi ma Samoa nei, ua manaomia tele ai le auaunaga a le Pulega o Tineimu ma Fa’alavelave Fa’afuasei. Peita’i ua le gafataulimaina e le aufaigaluega o iai i le taimi nei. E momoli ai le faafetai i le Malo, i le amanaia o talosaga tuuina atu pea mo le fa’aopoopoina lea o le aufaigaluega e fa’atinoina le tautua i le atunuu e pei ona i ai lenei aso fa’apitoa. Faafetai foi ia tatou paaga ma malo mai fafo mo la latou sosia sasa’a mai e faasoa mai ai le tomai ma le agavaa mo alii ma tamaitai tineimu.
E faamalo i le vasega ua maea ona a’otauina mo le auaunaga fa’atineimu ma fa’alavelave tutupu fa’afuasei. Sa outou faatino lenei fa’amoemoe mo le 11 vaiaso ina ia outou lava tapena i le tino, mafaufau ma le agaga, e faatino lo outou faiva ma tiute, a lea ua tatou futifuti manuula i tiasa, faamalo le onosai, lea ua tau lau o le faamoemoe, faafoi le Viiga i le Atua.
Ia manuia tele tofiga fou mo outou le au faau’u ua amatalia faapea foi le Komiti Faafoe, Pulega ma le aufaigaluega, o le paia i aiga ua mafai ona potopoto mai. Ia outou maua se Kerisimasi fiafia ma se Tausaga Fou Manuia.
Soifua ma ia Manuia.
(0)
