Saunoaga Faapitoa a le Afioaga Palemia mo le Faaauauina o le Tapunia o le Atunuu

0
28

Saunoaga afioga i le Palemia: Faaauauina o le Tapunia o le Atunuu atoa:

Aso Gafua, 24 Ianuari 2022

Ou te faatalofa atu i le faafofoga tapuai mai a si o tatou atunuu. Faamalo le soifua manuia i lenei aso. E le o toe po malaē i le faafofoga a le atunuu, i aiaiga mo le laasaga 3 o le puipuiga o le atunuu mai le pepesi o le Koviti 19, na mafua ai ona tapunia atoa si o tatou atunuu mai i le ta o le 6 i le afiafi o le Aso Toonai na tea nei, seia oo mai i le 6pm i le afiafi o le aso.

Sa feiloai i le aoauli nei le Kapeneta ma tapa le fautuaga mai le Komiti o Faalavelave Tutupu Faafuasei, i le tulaga ua iai le faagasologa o galuega mo le tali atu i le faamai, atoa ai ma le numera o i latou ua aafia i le siama.

O lea ua faailoa mai e le Matagaluega o le Soifua Maloloina, o le aoauli nei, ua toe faaopoopo ai leisi toalima (5) o i latou ua aafia i le faamai. O lenei toalima o le aufaigaluega o loo vaavaaia i latou e toasefululima (15) na muamua pesia i le siama. O i latou foi nei e toalima, o loo nonofo mau i totonu o nofoaga o loo fanofoesea ai i le falemai. O lona uiga ua 20 i latou ua aafia i lenei faamai e oo mai i le aoauli nei. O loo faaauau pea ona faia suega a i latou uma o loo faanofoesea e aofia ai ma le 208 o a tatou aufaigaluega sa galulue i le aso na taunuu mai ai le vaalele mai Ausetalia. O se taimi taeao i le taeao e tatau ona maua uma ai nei suega.

Talu ai ona o le faamamafa a le tatou Malo i le puipuiga malu o si o tatou atunuu mai le faaono pepesi i tua o le faamai, atoa ai ma le faamautinoa lelei o le maea uma o suega ai latou o loo faanofoesea nei, ma isi foi suega ua fuafuaina mo le Aso Tofi nei. Ua faaiugafonoina ai e le Kapeneta i le aoauli nei le faaauau o le tapunia atoa o le atunuu, e afua atu i le 6pm i le afiafi nei seia oo atu i le Aso Tofi, 27 Ianuari i le 6 i I le afiafi.

Peitai ua iai nai vaega ua talatala e pei o faleoloa uma, maketi, faletupe ma money transfer, o faletalavai ma fale e faatau ai cash power mo le atunuu e afua atu ona tatala i le 8am – 2pm i le afiafi o le Aso Lua, 25 Ianuari ma le Aso Tofi, 27 Ianuari o le vaiaso nei. Ua faia lenei tulaga ina ia maua ai le avanoa mo faatauga a le atunuu ina ia maua pea meataumafa ma vaega e moomia mo aso o le a faaauau ai le tapunia o le atunuu. E tumau isi aiaiga e pei ona muai faailoa atu.

E iai aiaiga o lenei fuafuaga e pei o le faamalosia o tali fofoga, pepa tui, tu vava, atoa ai ma le tapu o tamaiti e i lalo ifo o le 12 tausaga le matutua.

Peitai afai e aliae mai se tulaga ua pepesi le faamai i le atunuu, o le a toe agai loa le Kapeneta i le tulaga e tapu ai ona tatala nei auaunaga.

Samoa e, e ui o loo tatou iai pea i nei ituaso faigata, peitai matou te talitonu o loo tatou iai faatasi i le tausoaina o le tatou avega, ina ia malupuipuia pea si o tatou atunuu. O le tatalo ia mau pea le toovae, ma lava papale pea si o tatou atunuu a o taumafai lenei galuega i iu manuia.

Faafetai tele le faitatalo ma le tapuaiga mau i si o tatou atunuu.

Soifua.