FA’ASALALAUGA FA’ALAUA’ITELE
Aso Toonai 24 Iulai 2021
Afioga Fiame Naomi Mataafa, Palemia o le Malo Tutoatasi o Samoa
Ua tigipa’ō nei le uto e pei o le faiva i vai. Ua pafuga foi le a e pei ole faiva o seugagogo.
O lea foi ua tau i le niusina le faatautaiga sa fitāituga iai Samoa ma ana faigamalo.
E muamua pea le Viiga ma le Faafetai i le Atua soifua, i lona alofa e le mavae ua o tatou sopoia ai atuvasa faigata na feagai mo lo tatou atunuu ona o upufai o lo tatou Malo.
E faatulou aua le paia aua Samoa le atunuu pele. Aua le paia o Aiga ma Tama, o Tama foi ma Aiga. Le usoga a Tumua ma Pule, Ituau ma Alataua. Aiga ile Tai ma le Vaa o Fonoti.
TuIouna o mamalu faa-le-Malo. Tulouna ou mamalu faa-le-Tala Lelei.
Tainane le Paia o le Motusa ia Tutuila ma Manua ma le Faigamalo.
O lea ua a’e ai ma le malo faiva o Samoa ona la outou tatalo ma le tapuaiga e le aunoa ma tatou maua ai pea le mafanafana o le Alii e ui i taimi faigata.
Oute talitonu, ua nofo silafia e lo tatou atunuu le taunuuga ole faaiuga a le Faamasinoga o Apili, le Faamasinoga pito i maualuga a Samoa o loo taitaia e le Afioga ile Faamasino Sili, le afioga a Satiu Simativa Perese, le afioga iIe Faamasino o Niava Mata Tuatagaloa, ma le afioga ile Faamasino ia Tafaoimalo Leilani Tuala-Warren.
O lana faaiuga, ua faamaonia ai ma aloaia le sauniga o le faatautoga o sui mamalu o le Palemene na faia ile Malae i Tiafau i le aso 24 o Me 2021, ma ua aloaia faa-le-tulafono.
O le taunuuga o le faaiuga a le Faamasinoga o Apili, ua faamuta ai foi le Malo Tausi e afua atu ile aoauli ole Aso Faraile 23 o Iulai. Ma ua alaoia ai le faigamalo fou i lalo o la’u taitaiga o le Palemia o le Malo fou, faatasi ai ma Minisita ole kapeneta lea na faatautoina ile Aso 24 o Me 2021.
Oute fia faaagoaina ai lenei avanoa taua, e molimoli atu ai la’u faafetai tele Samoa i lo outou onosai ma le faapalepale. Lo outou taofi mau ile iumaea ma le to’ovae, a o talia le faagasologa o galuega a le Faamasinoga.
Faafetai i la outou tapuaiga le leo Samoa.
Faafetai le loto atunuu, Faafetai le alofa i o tatou aiga ma o tatou nuu ma lo tatou faasinomaga.
O le aso, na feiloai ai le Kapeneta ma nisi o faauluuluga o matagaluega autu a le Malo ma ua amata le galuega mo le see atu ole faigamalo fou.
Ua iai nei le fuafuaga, e tauaofia le Palemene ile avanoa muamua lava i le vaiaso fou. Ma ole galuega muamua o le pasia lea o le Tala ole Tupe mo galuega faaauau a le Malo.
Ua faatonuina le Matagauega o le Tupe, ina ia tapena se tala ole Tupe e faavae i Iuga ole Vaega 95 ole Faavae mo le faaogaina ole 25 pasene ole Tala Autu ole Tupe talu ai, 2020/2021.
O le a mafai ai ona faaauau le faagoioiga o le Malo, ma maua ai foi se avanoa e silasila ai le faigamalo fou ile tulaga o loo iai le tulaga tau tupe ma le tamaoaiga ole tatou atunuu, ae lei tapenina se Tala Autu ole Tupe.
E faaaogaina lenei avanoataua,e momoli ai le faafetai tele I lau Susuga Tuilaepa Sailele Malielegaoi, o le sa tulai ile foe o Samoa mo nei tausaga e tele. E le auaoa le lagi ma e le lilo e le lanu lau tuatua matapalapala mo Samoa ma ona tagata.
Faamalo mo galuega lelei uma sa e faia mo Samoa aoao. Ma e le vale sou taui Ielei mo lau tautua malo mo Samoa ma ona upufai.
Ae o la’u tatalo, saga mai ai o le tai, sagai mai ai ole lagi, tatou galulue faatasi aua le faaauauina ole tatou galuega tautua ile atunuu.
O le a see atu nei le faigamalo fou i ona Ofisa ile Aso Lua ole vaiaso fou, ise fetuunaiga ma le faigamalo tausi lea ua maea lona taimi.
Oute tautino atu le faanauanutaiga o la’u faigamalo ina ia toe faafoi lo tatou atunuu i lona tulaga na moemiti iai o tatou tuaa, na o latou gapatia seia oo ina o latou sisiina le fu’a o le saolotoga na ta’imua ai lo tatou Malo Tutoatasi lea o le a aulia le 60 tausaga.
E laualuga ia te au o le Palemia ma le faigamalo a le FAST, le toe faafoi lo tatou atunuu i ona faavae mautū, Toe faafo’i lo tatou atunuu i le faaaloalo masani e faavae ile alofa ma le fetausi a’i ua o tatou masani ai.
O le vaitaimi lenei o le faafouga.
Ua tuanai atuvasa o feeseeseaiga, ma ia tatou maua le agaga o le fefaamagaloa’i, ina ia mafai ona tatou toe faafoi lo tatou atunuu ia tatou aga masani o le faaaloalo mo le manuia o lo atunuu aoao.
O le taimi lenei o le amataga fou mo le tatou atunuu. Tatou galulue faatasi ina ia toe faafoi Samoa i se Samoa tatou soifua fiafia uma ai, se Samoa tatou te malu ai ma o tatou miamita ai e pei ona faanaunau ai o tatou tuaa.
Samoa, o a’u toe upu, ma la’u augani atu, ia tatou tutumau ile tatalo ma le anapogi. Pau lea o le tatou maluapapa, e a’e manuia ai faiva o Samoa mo sona lumana’i manuia.
Ia Soifua ma ia Manuia.
(17)
