SAUNOAGA AUTU A LE AFIOGA I LE SA’O FAAPITO MO LE TATALAINA ALOA’IA O LE FA’AOPOOPOGA O LE FALEMA’I FA’AITUMALO O SATUPAITEA & APITAGA O FOMA’I ASO FARAILE, 25 IULAI 2025.
Lau Susuga ile Taitai o le Sauniga,
Susu susuga i fa’afeagaiga mai fata faitaulaga eseese ua mafai ona tatou fa’atasi i lenei taeao
E’etai le mamalu o le Kapeneta
Le pa’ia o le Itumalo o Satupaitea, i lau Fono fa’avae, o le pa’ia i alii ma faipule, le loaloa o le itumalo i ona vaega eseese ua tatou fa’atasi
Susu lau susuga ile Sui Fa’atonu Sili fa’apea le Pulega a le Matagaluega o le Soifua Maloloina
Le pa’ia ma le mamalu o le atunu’u ua aofaga potopoto mai
Malo le soifua maua ma le lagi e mama.
O le asō, o se aso tāua mo lenei itumalo faapea lenei itu o Savai’i, aemaise ai lenei afio’aga, auā o lea ua tatou molimauina le tatalaina aloaʻia o le faalauteleina o le falema’i i Satupaitea (hospital extension), fa’apea ai ma le fausia o le fale fa’apitoa mo foma’i e tofia mai e fa’atino auaunaga fa’afoma’i mo le falema’i fa’aitumalo lenei.
O se tasi o miti na fau ao fau po a lo tatou malo, faapea le Matagaluega o le Soifua Maloloina, ma le fa’anaunauta’iga, ia maua avanoa tutusa e tagata uma, e latou te fa’aaogaina ai so’o se auaunaga tau le soifua maloloina, o lo o mo’omia.
Afai foi o lo o sapi ai le atunu’u o lo o nonofo ma aumau i Upolu, ia fa’apena foi i Savaii nei ma lo tatou itumalo. O lea la ua tatou molimauina fa’atasi i lenei taeao.
O lenei galuega sa fa’atupeina e le Malo o Samoa, e ala i Vaegatupe Fa’aagaaga a lo tatou Malo mo Polokalame Tāua mo le soifua manuia o o tatou tagata (Special Purpose Accounts), ma o le pine fa’amau lea o fa’anaunauga a lo tatou Malo, e siitia avanoa e fa’aleleia ai auaunaga ma atina’e tau soifua mālōlōina mo tagata uma, i itu uma o le atunu’u – e tusa ai ma fuafuaga ua fa’ataatia i le Fuafuaga Alualu Mamao o le Soifua Maloloina (Health Sector Plan 2019/20 – 2029/30) ma le Ta’iala o Atina’e o lo tatou Malo (Pathway for the Development of Samoa 2022-2026).
O le fausiaina o le fa’aopoopoga o le falema’i lenei fa’atasi ai ma le apitaga o foma’i, sa fa’amanuiaina ai le kamupani faufale o le Zheng Construction Ltd, i le tau aofa’i e SAT $471,365.06.
E tutusa lelei ma le tau sa fa’atinoina ai le galuega o le falema’i fa’aitumalo i Sataua.
O lenei galuega sa amataina i le aso 11 o Fepuari 2025, ma mae’a aloa’ia i le 13 o Iuni 2025 – e tusa lea ma le 4 masina ma le 3 vaiaso.
O se fa’ata’ita’iga lelei lea o le galulue soofaatasi o le Malo e tauala atu i le Matagaluega o le Soifua Maloloina ma le Matagaluega o Galuega Tetele, le kamupani faufale ma le afio’aga nei.
A tatou pulupulu lima fa’atasi, e māmā ai se avega, ma vave ai ona tino mai a tatou galuega.
O lea, e avea ai lenei avanoa, e fa’aleo ai le agaga fa’afetai tele i le Matagaluega o Galuega Tetele (Ministry of Works, Transport & Infrastructure) faapea le Matagaluega o le Soifua Mālōlōina (Ministry of Health) mo le mata’aalia i le mata’ituina o le fa’atinoga o lenei galuega.
E le gata i lea, e fa’aleo le agaga fa’afetai ile itumalo nei fa’apea le afio’aga nei mo le tausiga ma le puipuia o le saogalemu o le aufaigaluega a le kamupani sa nafa ma le fausia o nei galuega ile vaitaimi sa fa’atinoina ai.
E fa’afetaia foi le kamupani Zheng Construction Ltd mo le fa’amaoni ile fausia o nei fale matagofie ua tatou molimauina e tusa ai ma ta’iala fuafuaina ma le taimi fa’atulagaina o lenei galuega.
O se molimau manino lea o le va’ava’ai mamao o le tatou malo, i Atina’e ma Auaunaga Fa’atino mo le Soifua Mālōlōina, i itu uma o Samoa, e aofia ai ma Savai’i.
O le tatalo i le aufaigaluega o le a fa’aaogaina nei aseta anagatā, ia fa’aaoga ma le tatau ma ia tausi lelei nei nofoaga fou ua fausia, e lagolagoina ai le faatinoga o auaunaga ma galuega fa’atino mo le tautuaina o le soifua maloloina o le mamalu o le atunu’u, o lo o alala ma pāpā aao i lenei itu o le atunu’u.
Ia saga fa’amanuia mai le Atua i lenei galuega, le nu’u o Satupaitea, le aufaigaluega o le soifua mālōlōina, fa’apea le Malo o Samoa i ana taumafaiga uma mo le lumana’i manuia o si o tatou atunu’u.
Soifua ma ia manuia.
Vacancy at SOS in Savaii
Vacancy at Taula
Vacancies with Government SOEs
- Tuala Siaki Reappointed to Lead Gambling Control Authority for Another Three Years - October 9, 2026
- Faatoese le Palemia mo le Faaaogaina o le upu “Heil Hitler” i le 2007 - October 6, 2026
- 14 Ofisa Sili a le Malo na Faatautoina - September 23, 2026
