Saunoaga Autu: Tala Faasolopito o le Sao o Sagaga 4 i Upufai o le Malo e ala i le Palemene

0
1541

Saunoaga a le Tamaitai Palemia, Afioga Fiamē Naomi Mata’afa
Polokalame Sagaga 4 mo le 60 Tausaga o le Tutoatasi, Aso Faraile 28 Oketopa 2022, Nono’a Saleimoa.

O lea ua noanoa i le fata faitaulaga le viiga o le Atua, ma la tatou faafetai, e pei ona
osia e lana auauna i lenei taeao. – lau Susuga i le Epikopo, Vai Faamau. Faafetai i le pule alofa a lo tatou Matai, ua mafai ai ona aulia ma le manuia le faamoemoe o le Itumalo lea ua o tatou molimauina.

Tulouna le paia maualuga o le Itumalo i le afifio o Aiga e tolu, Afifio Maopu, Alo Sina ma Alo o Malietoa. E pola puipui e le fetalaiga a Luatua ma le Gautāala, Le Faletolu, ma le Si’uolefanua. Malo le soifua manuia.

O tala fa’amauina o ou vaifanua, i le taeao na gāfoa ai le ata, ma tofutofu ola ai tama ina ua ifo le aso o le Malietoa, ma lou tai tafola e natu i ai le oa o le gataifale, e faamau gagana i eleele nei ma ou laufanua, aemaise le fale tuamasaga.

E mafai ai ona faapea, o eleele faamanuiaina, o laufanua e mapu i ai le ua tigā, ma le fa’asuaga o folauga saogalemu.
E faapena le agaga o lenei taeao i le vaavaai atu i le faamoemoe o le Itumalo mo le faamanatuina o le 60 tausaga o lo tatou Malo Tutotasi. O le tala faasolopito o le sao o le Itumalo i upufai o le Malo e ala i le Palemene, na afua mai lava i le Fono Faavae a le atunuu, lea sa iai tamalii o le Itumalo.

O le uluai paeaiga a le Palemene i le 1961 sa uluai filifilia ai le Afioga Laufili Tusani Time i le Nofoa o le Itumalo o Sagaga-Le-Falefa. O le 1973 i le paeaiga lona 4 a le Palemene, sa tulai mai ai le Afioga i a Luatuanuu Aitaua mo le lua paeaiga.

O le 1979 na tulai mai ai le Afioga Nonumalo Leulumoega Sofara e tauave le Tofi o le Itumalo, ma sa faaauau ai mo le tolu paeaiga. O le 1988 i le paeaiga lona 10 na tulai mai ai le afioga Sapa’u Lolesio. Ona toe tulai mai ai lea o Nonumalo Sofara i le 1991.

O le Tofa Leatufale Roy Brunt na tauaveina le Nofoa o le Itumalo i le 1996. A o le afioga Patea Satini Epati i le 2001. Ona sosoo lea ma le Afioga Solamalemalo Keneti Sio i le 2006, a o le Afioga Tuisa Tasi Patea i le 2011, ona toe tulai mai le Loau Keneti Sio i le paeaiga talu ai.

O le paeaiga lona 17 lenei o le Palemene, ua suia ai le Igoa o le Itumalo i a Sagaga 4, lea ua tulai mai ai le afioga ia Tagaloatele Pasi Poloa i le Nofoa o le Itumalo.

O lona uiga, e lē itiiti le sao o le Itumalo lenei i upufai o le atunuu e ala i le Palemene.

Sa umia foi e nisi o Tamalii sa tulai mai i le Nofoa o le Itumalo tofiga maualuluga o le Malo e pei o le Fofoga Fetalai, Minisita o le Kapeneta, Minisita Lagolago ma tofiga eseese i Komiti Faapalemene.

O le faamoemoe la o le asō, e ao ai ona tatou manatua le sao o tamalii o le Itumalo sa tauaveina le finagalo o le Itumalo i le Fono Faavae ma le Palemene i le 60 tausaga taluai, aemaise o le sao o tupu ma tamalii, o tulatoa, saoao, faletua ma tausi, augafaapae ma le malosi o le itumalo, e lagolagosua i galuega a le tatou Malo mo le atinae o le atunuu.

Faafetai tele mo lo outou sao taua.

O lenei foi faamoemoe ua lalago faatasi ma le polokalame a le tatou Malo mo faamanatuina o le 60 tausaga o lo tatou Tutoatasi.

O le anava o le tatou faamanatuga, ‘folau ma le faatuatua’. O le folauga o le faatuatua, e taitai au ma faatonu folau le Atua.

O upu ta’utino, e le malū pea aso uma. A o lo tatou folau faatasi ma Le Atua, e mafai ai ona tatou saogalemu faatasi.

Ia agalelei Le Atua i le faamoemoe o le Itumalo. Ia avea o se isi auala e saga faamalosia ai sootaga o itutino eseese o le Itumalo, ma maua atili ai le agaga o le feoeoea’i ma so’oso’otauau faatasi, e tulei polokalame mo le atinae.

Ia manuia le tapuaiga mau a aiga ma Luatua, aemaise nai matua tausi sei o’o lava i fanau iti a le Itumalo.

Soifua.