Saunoaga Autu mo le Tatalaina o Faigamalaga a le Samoa Airways i le va o Upolu ma Savai’i

September 30, 2020

152

Afifio o Minista o le Kapeneta

Fa’auluuluga o Matagaluega ma Fa’alapotopotoga a le Malo

Sui o Pisinisi tuma’oti o le tatou motu nei ma le loaloa ua potopoto

O lea ua tatou feiloa’i i le malae va’alele i Maota nei. O le 1994 na fausia ai le malae va’alele lenei e fa’aaoga mo femalaigaiga i le va o Savai’i ma Upolu. O le 1997 sa mafai ai ona lele sa’o mai Amerika Samoa va’alele laiti ma tulauele’ele ai, mo le fa’afaigofieina o le malaga mai o le atunu’u mai Amerika Samoa i Savai’i, ma toe foi atu. Talu mai lena taimi sei oo mai i le asō o lo’o fa’aauau pea galuega mo le tausia lelei o le malae va’alele e le tatou Pulega o Malae Va’alele e pei ona outou silasila atu iai.

O le taeao nei, o lea ua toe tulauele’ele mai le Samoa Airways i Maota nei, e toe fa’aauau ai le tautua mo femalagaiga i le va o Savai’i ma Upolu. Ua talafeagai tonu ma lenei vaitau i le feagai o le lalolagi ma le tau fofoina o a’afiaga o le Koviti. O se fuafuaga ina ia maua ai pea e le atunu’u avanoa e malaga fa’avavevave mai ai i Savai’i mo o latou tuatuagia pe asiasi foi ma toe foi vave atu i Upolu. E manatu foi o se tulaga lelei lea mo le au fai faletalimalo i Savai’i nei e saga u’unaia ai i latou o lo’o papa’ao i Upolu e malaga mai i Savai’i e tafafao ma fa’aaoga ai auaunaga tau faletalimalo i le motu. O le agaga maualuga ia so’oso’ofau ma so’oso’otauau le tatou galuega e tapu’e tulaga taua mo le atina’e o Samoa. O le fa’atinoina lea o le pitolaau a le Malo, e ao ona galulue fa’atasi ai ma pisinisi tuma’oti ma le Pulega mamalu a ali’i ma faipule

O le lu’itau mo le aufai hotels ma pisinisi i’inei, ia galulue fa’atasi ma le tatou va’alele e u’uina lenei auaunaga mo le atunuu. E mafua ona tosina tagata e fia malaga i le va’alele i Savai’i pe a lelei le fa’ailoaina i le atunu’u o lenei auaunaga fa’atasi ai fo’i ma le tau ina ia mafai ona gafatia.

E na o le 10 minute e lele mai ai le va’alele mai Uplou ae taunu’u mai i Savaii. O lona uiga matua vave lava. E aoga tele mo i latou e fia vave ona o’o mai i Savaii ma toe foi i Upolu ia pe ma’i vasa fo’i i le fa’alue mai i tatou va’a lalo. O le a vave ai fo’i ona auina atu ni gasegase tigaina mai Savai’i nei i Upolu mo togafitiga fa’anatinati, mo le fa’asaoina o le soifua. E fa’apea fo’i i le auina atu o le fesoasoani muamua i le tatou motu nei pe afai e a’afia ini fa’alavelave tutupu fa’afuasei.

O fuafuaga mo le lumana’i e tatau ona iai se Ofisa va’alele i Savai’i nei e fa’afaigofie ai ona faatino galuega mo femalaga’iga. O lo’o galulue le Samoa Airways ina ia mafai ona iai se malaga tu’u sa’o atu i Pago Pago mai Savai’i e fa’afaigofie ma vave ai femalagaiga. O lo o fuafua foi mo le taimi e toe tatala ai femalagaiga mai atunu’u mamao, ina ia mafai ona iai ni connecting flights mo i latou o malaga mai Niu Sila ma Ausetalia i Savai’i nei. O fuafuaga uma nei e auga uma lava i le fa’aleleia ma le si’itia o auaunaga tau femalagaiga i le va o Upolu ma Savai’i. Ia fa’amamanuia mai le Atua i lenei fa’amoemoe, ia sausauina foi e lona toto i latou o le a fa’aogaina lenei auaunaga