Home Press Release SAUNOAGA AUTU: FA’AU’UGA A ALII MA TAMA’ITA’I FOMAI

SAUNOAGA AUTU: FA’AU’UGA A ALII MA TAMA’ITA’I FOMAI

0
999

Saunoaga Autu, Afioga i le Minisita o Soifua Maloloina, Hon Valasi Luapitofanua To’ogamaga Tafito Selesele i le faauuga o alii ma tamaitai fomai. 

E mua’i fa’atalofa atu ile susuga i le ta’ita’i o le sauniga, faafetai mo talosaga
molia o lenei itula ma se ‘upu fa’alae’iau ua e fofogaina, e tõmatauina ai le
fa’amoemoe o ali’i ma tama’ita’i foma’i e to’a 15 fa’au’uina e pei ona tatou iai ile
asō.

E talitonu le manatu, ua nofo fale i aai o finagalo o le ‘au fa’au’u nei, se upu
fa’alae’i’au ua e fofogaina, e tapu’e ai lo latou soifua galulue e tusa ai ma lo latou
vala’auina e le Atua. Ia alofagia e le Atua, fa’atumu lau utu faale-agaga auã le
Atua ma lona finagalo.

Ou te fa’atalofa atu foi i Lau susuga ile Ta’ita’ifono o le Fono Fa’afoe mo Tomai
Fa’afoma’i, tainane le pa’ia o le saofaiga o Alii ma Tama’ita’i Foma’i, le afifio o
pa’ia o aiga ma mātua o le ‘au fa’au’u ua aofaga potopoto mai, faapea i latou ua
patino iai lenei aso.

O upu i taeao o le atunu’u, o upu ua uma ona mamanu fa’atiti ile tofã i ãiga ma
le fa’autaga i faleupolu. O ona sa foi ma pa’ia, ua mae’a ona totofi, ma o le a le
o’o iai se fa’amatalaga, ae tatou fa’aaogaina pa’ia o le Atua, e ‘auga iai lenei fa’amoemoe, ma le taeao sili, o le taeao na alaga ai le leo o le fa’aolataga ina ua auina mai e le Atua lona Alo o Iesu Keriso e togiola i tatou, o le taeao lena e iai le asõ.

Ua maualuga le asõ auã e maualuga lē e ona le aso. Ua fa’ailo foi ‘auga o aute o
lenei fa’amoemoe e pei ona iai lenei mafutaga.

I lo’u tulaga fa’a-Minisita o le
Soifua Maloloina, e lagona le fa’agae’etia ma le loto fa’afetai ua fa’ataunu’uina
ma le manuia le fa’amoemoe o alo ma fanau nei o le atunu’u, e fesoasoani ile
tulaga ‘uti’uti o iai fomai e tautuaina le soifua maloloina o le atunu’u.

E lē taumate le tele o galuega ma auaunaga o le soifua maloloina e mo’omia le fa’aleleia i lenei vaitau’ auã le tali atu i mana’oga tau le soifua maloloina o le atunu’u, aemaise lava i auaunaga tau foma’i. O lea la ua tau lau o le fa’amoemoe o alo ma fanau nei, o le viiga e foi ile Atua, auā o fa’anaunauga nei a lo tatou malo, e ala ai foi ona fa’amatu’u mai tupe e fa’atupeina ai a outou a’oa’oga, ina ia maua le tomai ma agava’a mo’omia, auā lava le soifua maloloina o o tatou tagata.

E avea foi lenei avanoa e fa’aleo ai le agaga fa’afetai ile tapuaiga mau ai a le
mamalu o aiga, faapea mātua o fanau fa’au’u. E talitonu sa outou tu’i le
mulipapaga ma fai faiva o Fe’epō ina ia tini ma tau lau o le fa’amoemoe o alo ma
fanau nei. Fa’amalo tapua’i, fa’amalo lagolago i taumafaiga a nai fanau.

Mo le fanau fa’au’u i lenei vaega o le aso, o la’u tatalo, ia fa’atāua lo outou
vala’auina. Ia fa’amuamua le loto alofa ma le fa’amaoni e fa’atinoina ai tiute ma
faiva ua fa’aeaina ai outou e le Atua e pei ona o tatou patipatia ile asō. Ia
fa’amuamua o tatou tagata i la outou tautua, ae le o le tupe.

A tatou galulue ma le fa’amaoni, ma faia ma le alofa, e mulia’i fa’amanuiaga tau tupe tou te maua, i fa’amanuiaga e tu’u gutu mai e le mamalu o le atunu’u tou te tautuaina.

Ia o tatou manatua, ua afio lo tatou Alii Fa’aola ile lagi, ae ua tu’uina mai lana
auaunaga fa’aola sa faia i le lalolagi tatou te fa’aauauina, a’o nei mea uma sa faia
e Iesu Keriso, sa ofo fuaina e pei o lana fetalaiga, “Ou te lei sau e auauna mai
tagata ia te a’u, a ia ou auauna atu i tagata”.

Ia fa’apena se lagona e afua ai lo outou ola tautua. Ia galue ma le filigā, ma ia
faia ma le alofa. O a faigata ma lu’itau o le a feagai ai ile fa’atinoga o le
auaunaga, saili ile Atua.

Ia alofagia e le Atua lo outou soifua galulue o le a amatalia. Ia manuteleina foi le ua tatou molimauina fa’atasi lenei fa’amoemoe tāua.

Soifua ma ia manuia.

LEAVE A REPLY

Please enter your comment!
Please enter your name here