Saunoaga: Afioga i le Tamaitai Palemia mo le Faalauiloaina o le Faailoga ma le Sini Autu – 60 Tausaga o le Tutoatasi o Samoa

0
44
Eleele Fou, 11 Me 2022.
Lau Susuga i le Taitai o le Sauniga – Lau Susuga Mariota Siaea;
Lau afioga i le Ao Mamalu o le Malo ma lau Masiofo;
Lau afioga i le Sui o le Fono a Sui Tofia;
Lau afioga i le Sui Palemia ma Minisita o le Kapeneta, faapea Minisita Lagolago;
Lau afioga i le Faamasino Sili, ma Alii ma Tamaitai o le Faamasinoga;
Lau afioga i le Fofoga Fetalai ma Sui Mamalu o le Palemene;
Members of the Diplomatic Corps;
Faauluuluga o Matagaluega ma Faalapotopotoga Tumaoti;
Susū Taitai o Ekalesia ua o tatou mafuta;
Le paia sauo’o o Samoa mai ona ao seia o’o i ona i’u, ua potopoto i lenei afiafi, ma le faafofoga tapuai mai a le atunuu.
E faatalofa atu, faamalo le soifua, ma le lagi e mamā.
Ua faaifo nei le na’aloa i lona taogā mutia lelei, ina ua gāfoa le ata o ta’uleleia, e faafeiloa’i mālama o matagofie. Aua sa o tatou taumate i le ete, pe tua ma ni ā la tatou folauga e faafeiloai le 60 tausaga o lo tatou Malo Tutoatasi.
Peitai o le afiafi nei, o lea ua saunoa le Susuga i le Taitai o le sauniga, e molimoli la tatou faafetai se’i sula le alofa tunoa o lo tatou Atua, aua o lea ua toe o se aga ona tatou aulia lea o le Aso 1 Iuni e faailogaina ai le 60 tausaga, talu ona ia tōina mai lo tatou tofi e ala i lo tatou Malo Tutoatasi, e pulea ma faafoe e tatou lava. Ia foi le viiga i le Atua e faavavau.
O le afiafi nei, ua tatou molimauina ai le taunuuga o le filifiliga sa gafa ma le Komiti o Tapenaga o le Tutoatasi, mo se Faailoga ma se Sini Autu e ‘au’au i ai le faamanatuina o le 60 Tausaga o lo tatou tutoatasi.
O le mau a le atunuu, e tele aso ae lē lau aso, e lasi foi taeao, ae lē lau taeao. O lo tatou aulia manuia o lo tatou 60 tausaga, o se matatia iloga lea o lo tatou tala faasolopito. E le gata i le tatou savaliga mai le tele o lu’itau sa muai asaina e o tatou tuaā, na mua i malae e momoli le tatou mau mo lo tatou tutoatasi, ae faapea foi i le faasolosolo mai o le atiaeina o le Malo ma le atunuu, i le va feagai ai ma isi Malo o le Pasefika ma le lalolagi atoa. O vala tupito ia, na finagalo ai le Kapeneta e tauala mai i le Komiti o Tapenaga o le 60 Tausaga o le Tutoatasi, ina ia iloilo ma fili tupe toa se Faailoga ma se Sini Autu, e taula i ai le faamanatuina o le 60 tausaga o lo tatou Malo tutoatasi. O le faamoemoe maualuga o lenei fuafuaga, ina ia tāpā le filigā mafua lelei a le atunuu, e faisao ai i le auau o le tapenaga, aemaise le toe tepa i tua i lenei savaliga umi, ma le agai atu i le lumanai.
O le ala lea sa faasalalau faalauaitele ai i le tulaga faatauvā le avanoa mo soo se tagata Samoa o loo alala i Samoa nei ma soo se itu o le lalolagi, e tuuina mai lo latou sao. E 59 le aofai o talosaga sa tuuina mai ina ua tapunia le tauvaga, ona galulue ai lea o le Komiti e iloilo talosaga, e tusa ma alafua sa faataoto e togi i ai lenei tauvaga. Sa faatulaga ai foi ma faamaonia e le Kapeneta le faailoga tupe e SAT$5,000 e tuuina i le talosaga o le a manumalo.
O se taimi āmulī e pei ona faatulaga atu i le polokalame, ona faailoa lea o le Faailoga ma le Sini Autu ua filifilia. I le aotelega o le faamatalaina o le Faailoga, ua faatulagaina e faapea;
1. O loo atagia ai le Savaliga a Samoa, i le afuafua mai o le sailiga o lona Malo Tutoatasi, e pei o le Mau a Tumua ma Pule. O le uiga lea o le mua tosi tasi paepae o loo i le fuainumera ‘60’.
2. O lanu ua faaaogaina, o loo atagia ai lanu o lo tatou Tagavai – lanu mumu, pa’epa’e ma le lanu moana.
3. O lo o atagia mai foi i le Faailoga lo tatou faatuatuaga faakerisiano i le maliu ma le toetu o lo tatou Faaola o Iesu Keriso, e pei faasinoina e fetu e lima;
4. O loo momoli mai e mamanu le vaaiga e foliga o ni tamatama’i lima, o le ata manino lea o le fusia o tagata uma i le loto e tasi, ae lautua i le alofa, feoeoea’i ma le fetausia’i, o loo folau ai pea Samoa i le filemu e oo mai i le asō.
O vala autu ia o loo mamanuina ai le Faailoga ma taunuu ai i le filifiliga o le Sini Autu mo le faamanatuina o le 60 tausaga o lo tatou Malo Tutoatasi e fa’apea, “Folau ma le Faatuatua”. O le folauga a Samoa mai nei atuvasa e tele sa o tatou asaina talu mai le 1962, e i ai le talitonuga, ana tatou le folau ma le faatuatua i le Atua, ma lalafo uma o tatou faamoemoega ia te Ia, e faatonu folau mai, tatou te lē aulia lo tatou 60 tausaga. O la tatou folauga foi e faaauau i le lumanai, tatou taofi faatasi, ua na’o le Atua tatou te faatuatuaina, na te taitaia Samoa ma lona Malo i le manuia ma le saogalemu.
I lo’u tulaga faataitaifono o le Komiti o Tapenaga, ou te fiafia e faalauiloa aloaia le Faailoga ma le Sini Autu ua filifilia ma ua manumalo i le tauvaga, o se kamupanī mai Niusila a tamafanau a Samoa, ae o loo i ai foi lo latou lālā i Samoa nei, ua faaigoaina – O le BLUWAVE SAMOA.
E avea foi lenei laolao e momoli atu ai le faafetai tele i a i latou uma na resitala ma tuuina mai a latou tapenaga mo le tauvaga. E tele le oa ma le sosia o mafaufauga ma faaupuga sa matauina e le Komiti, na atagia mai i nei tapenaga. O le faitau a le atunuu i faigāmea i le tai, ‘e lē mua uma ni va’a’, ae lē itiiti le faafetai i lo outou sao tāua, e ala i lenei faamoemoe sa taumafai i ai le Komiti.
O’u te faailoa atu foi, o lenei Faailoga ma le Sini Autu, o le meatotino a lo tatou Malo, ma ua resitalaina faaletulafono. O tulaga masani faaletulafono e ao ona mulimulitaia, pe afai e fia faaaogaina e nisi lenei faailoga ma le sini autu.
O le mea lea, ou te fiafia e faasilasila atu i le paia o lenei sauniga ma le faafofoga maimoa tapuai mai a Samoa, ua tatalaina nei le Faailoga ma le Sini Autu mo le faailogaina o le 60 Tausaga a lo tatou Malo Tutoatasi.
O lenei faamoemoe ua tamua ai tapenaga ma polokalame uma ua fuafuaina mo le tausaga atoa, mo le faamanatuina o lo tatou Tutoatasi mai i le aso 1 Iuni, 2022, seia aulia le aso 31 Me o le 2023.
Ia faamanuia mai le Atua i lenei afiafi, ma ia tumau pea lona filemu ma lona agalelei, aemaise o lana faamalologa mo Samoa.
SOIFUA MA IA MANUIA