Saunoaga Afioga i le Palemia mo le Faamanuiaina o le Tausaga Fou 2022

0
380

O lea ua faaifo malama o le tausaga a mavae, ae totogo ane faga-o-malama o le
tausaga fou – 2022.

Ua faō le vaa o mala, ae taoto i lago tonu le sa o manū i la
tatou folauga. Faafetai le Atua le tautai, malo alofa. O lau pule lea ua toto tetele, ua o matou sāpaitali fa’atua eleele.

Ou te faatulou atu i le afio o lau Afioga i le Ao Mamalu o le Malo ma lau Masiofo, Afio le Sui o le Fono a Sui Tofia, Afio le Sui Palemia ma Minisita o le Kapeneta. Afio lau Afioga i le Faamasino Sili ma Alii ma Tamaitai Faamasino, Afio lau
Afioga i le Fofoga Fetalai ma Sui Mamalu o le Fono Aoao Faitulafono. O le Paia aua Aiga ma a latou Tama, O Tama ma o latou Aiga, Tumua ma Pule, Ituau ma Alataua, Aiga i le Tai ma le Vaa o Fonoti.

Ou te faatulou atu foi i le tapuaiga a Tutuila ma Manu’a. I le afio o le Kovana ma le Faigamalo i le Pulega Faatonu, le Faamasinoga, ma Maota e lua o le Palemene o Amerika Samoa.
O le paia lea aua le Faleagafulu ma le Nofo-a-Maopu, Sua ma le Vaifanua, Fofo ma Aitulagi, Ituau ma Alataua, Saole, ma le Launiu na Saelua. Le afio o Faatuiolemotu, Le Laau na amotasi, Alalatai tootoo o le Faleula ma Upu i le Manuatele.

Ou te faatalofa atu i Sui o Malo ma tatou paaga mai Fafo, Faauluuluga o Matagaluega a le Malo, ma pisinisi tumaoti i le atunuu.

Ou te ofo alofa atu foi i le aufaigaluega paia a le Atua i tulaga tofi mamalu i le nofo
a Ekalesia eseese i Samoa.
Ua faafofoga le atunuu i le malelega a lana afioga i le Ao Mamalu o le Malo, i lana faamanuiga mo le Kerisimasi i le autu – o le Atua manumalo, ua afio mai, e mau faatasi ma ona tagata.

O la tatou malaga i lenei tausaga e mafai ona faamatalaina i upu faauuina o le Pese 18, o loo faamauina i le Tusi Pese a le Ekalesia Metotisi. E faapea lona faitauina.

‘A pei se vaitafe le fifilemu, Pe lutia nei i le sou, ile olaga nei, ou te molimau pea, E lelei, e lelei le Alii’.

Na amata le tatou folauga i le amataga o lenei tausaga i le faamalumalu mai o faigata o le faamai oti o le Koviti 19. O ia faigata ua solovī ifo ai tamaoaiga o atunuu uma ma aafia ai le atinae auiluma o Malo o le lalolagi, ma soifuaaga faaletagata soifua ona o galuega ma pisinisi ua faaletonu.

Ona sosoo ai lea ma le faiga filifiliga a le atunuu i a Aperila, ma e le o toe po pe lilo mataupu na tulai mai, na tauau ai ina numi le fau, ma nunu le toau i Vaega Faaupufai. Peitai, e ui i nei souā, tatou te molimau faatasi, e tumau pea le faamaoni ma le matagofie o le Atua i aso uma. Ou te talitonu, ana le seanoa lana taitaiga mamana, tatou te le mafai ona aulia manuia mai le faaiuga o lenei tausaga. Ia fo’i le viiga ma le faaneetaga i le Atua.

I le tulai mai ai o le faigamalo fou a le Faatuatua i le Atua Samoa ua Tasi, o se suiga tele lea talumai le 40 tausaga ua mavae i tulaga tau upufai o Malo. O tulaga masani ia o Malo temokarasi.

E fesuiai faigamalo, e faapena foi i Taitai e tofia mai e le atunuu mai lea taimi i lea taimi, ae tasi le faamoemoe lautele e fau mau ai anava a soo se faigamalo, ia auauna mo le atunuu e atinae le Malo, tapu’e ma faatumau pulega lelei e faavae i tulafono ma faiga faavae maoti, ia aoaoina ma soifua maloloina le atunuu, ma soifua fiafia tagataanuu uma.

 

E faapena le agaga o loo laualuga i a te au ma le faigamalo ua tulai nei. E matou te naunau e faatino i le atoatoa auaunaga a le Malo, e ala i tomai ma le malosi ua aumai e le Atua, e faatino ai le tautua ia te oe Samoa le atunuu pele.

Talu mai Iulai o le tausaga nei ina ua amata galuega a au nei ma le Kapeneta, ua maea ona faamaonia le Tala Faatatau Autu o le Tupe, ma ua faagasolo galuega a le Malo i ona itutino eseese uma. Ua maea ona faamatuu atu fesosoani tau tupe mo a tatou atinae tau turisi, o pisinisi, ma asosi o tagata faigaluega, e fesoasoani ai e tali atu i aafiga ogaoga ua tulai mai ona o le Koviti 19.

Ua maea foi ona tuuitiitia le tau o le eletise ma le suavai i le 20%. O loo faagasolo foi le faamautuina o le faamatuuina atu o le tai tasi le miliona mo atinae o itumalo, e pei ona fuafuaina e le Malo.

O loo faaauau ona ave le faamuamua a le Malo i taumafaiga uma o loo faatino mo le puipuiga o le atunuu mai le Koviti 19. Ua atoa nei le lua tausaga o faatino lo tatou puipuiga, ma e ui i le tele o luitau i le fesuisuia’i o foliga o le siama, ma le faaauau pea ona pepesi ma maliliu tagata i le tele o atunuu o le lalolagi. Peitai o
Samoa nei, o loo sologa manuia ma puipuia pea.

E faapea foi i a tatou fesootaiga ma a tatou paaga o Malo ma Faalapotopotoga mai fafo, o loo faaauau pea ona tatou nutinuti mea faatasi i le atinaeina o si o tatou atunuu. E ui ina lē mafai ona toe femalaga’i itutino o le Malo e pei ona masani ai, a o fesootaiga tau tekonolosi o loo faaauau ai pea ona tuuina atu le sao o Samoa, i soalaupulega ma faiga faaiuga i mataupu tetele o feagai ma Malo o le lalolagi, aemaise le atinae o le atunuu.

O le mea lea, e le faaitiitia le loto faafetai i le tapuaiga a si o tatou atunuu a o alofaiva le Malo i galuega o lenei tausaga. E afua mai i tumutumu o afioaga ma
alalafaga, o faiganuu eseese, o le tagata ma lana e atia’e.

Faamalo le pale, faafetai tele le galulue. E tumau pea le galulue so’oso’otauau atu o le Malo ma afioaga ma alalafaga uma i galuega ma atinae o loo faatino nei, ma fuafua mo le lumanai.

Ou te faafetaia le sao o tatou paaga mai fafo. Ua autausagā lo tatou Malo Tutoatasi, ua loaloa foi tausaga o o tatou galulue vavalalata pea ma Malo ma Faalapotopotoga mai fafo, aua le atinae manuia o Samoa. Faafetai mo lo latou sao taua i si o tatou atunuu.

Ou te faafetai atu i le aufaigaluega a le Malo i ona itutino eseese, faapea Kamupani ma Faalapotopotoga Tumaoti uma i le atunuu. Faafetai tele le galulue ma le faitaulaga mo Samoa. O outou ua aoaoina i poto ma tomai eseese, o taleni ma meaalofa aua si o tatou atunuu.

Ae faapito augafa se faafetai i le aufaigaluega o loo muāau, aua le puipuiga o le atunuu mai le Koviti 19. Matou te iloa le mamafa ma le faigata o la outou galuega, e pei ona ta’imua e le Matagaluega o le Soifua Maloloina ma le Komiti o
Faalavelave Faafuasei. Peitai o loo maitauina lo outou faamalolosi ma le mataalia i
lo outou faiva, e le gata i le puipuiga i o tatou tuaoi faavaomalo, o tagata malaga
mai, o le faatinoina o tuiga mo le Koviti, ae le o tuua la outou tautua mo le atunuu e asiasi atu ona o gasegase. Faafetai tele le tautua atunuu, faamalo alofa i a Samoa.

Ia faamanuia le Atua i lo outou soifua auauna.

Le paia o Taitai o Ekalesia, ma le aufaigaluega totofi a le Atua i Samoa nei ma atunuu e mamao, e le mavae le agaga faafetai i lo outou faiva o le tatalo mo si o
tatou atunuu. E ui ina souā la tatou savaliga, ou te taofi o lo outou tulivae i luma o le Atua, o loo to’afilemu ai le atunuu. Aua e leai se poto, e leai lava se malosi na te mafaia ona puipui Samoa mai ni to’atugā ogaoga, ua na o le Atua lava.

O le ala lea o le faaauau pea o le faatauaina e le Malo o le vaiaso o tatalo ma anapogi i le atunuu atoa, tatou aufaatasi ai e momoli talosaga ma anapopogi i luma o le Atua, ina ia puipui mai ma apelepelea pea le atunuu i ona aao alofa. Ua atofaina ai le Aso Sa, 2 o Ianuari e faamauina ai le vaiaso o tatalo ma anapogi i le atunuu, seia oo atu i le Aso Faraile, 7 o Ianuari 2022.

O le Tausaga Fou lenei, ua atoa i ai le 60 tausaga o lou Malo Tutoatasi. O se tausaga tatou te saga matimati ai lo tatou soifua atinae o le tamaoaiga, i le sololelei ma le amanaia o le sao o tagata uma o le atunuu.

Samoa e, ia ta’ita’i pea e le Atua lo outou soifua laulelei ma so matou ola i le Tausaga Fou – 2022, i lona manuia ma lona filemu. Ia manuia le Tausaga Fou.

Soifua.