SAUNOAGA AFIOGA I LE PALEMIA: LE AFIOGA FIAME NAOMI MATAAFA
FAAAUINA O LE TAPUNIA O LE ATUNUU ATOA MO LE ISI 24 ITULA
ASO LULU 26 IANUARI 2022
O le a lilifa ia i tai loloto faiva o tiuga, ae mapu ane i Niafane ma lalafo taula i mālolo, i le faafofoga tapuai mai o si o tatou i lenei ituaso. Faafetai i le alofa tulituliloa o lo tatou Atua o loo mafai ai pea ona tatou folau i nei ituaso faigata.
O lo o faaauau pea le tulituliloaina ma le mata’ituina o galuega a le tatou Malo mo le puipuia o Samoa mai le pepesi o le siama o le KOVITI19. E oo mai i le aoauli nei, o loo tumau pea le aofa’ o i latou ua faamaonia le aafia i le faamai i le 26. O le 21 o i latou ua aafia, o pasese sa malaga mai i le vaalele na taunuu mai i Samoa i le Aso Lulu o le vaiaso na tea nei. O le toalima (5) o i latou, o a tatou Tausi Soifua o loo vaavaaia i latou ua aafia i le faamai i totonu o le nofoaga o lo o faanofoesea ai i Motootua.
E oo mai i le taimi nei, o loo manuia ma e leai ni auga o aliae mai i le toaluasefulu (26) o i latou ua aafia i le siama, ma o loo faatino uma vaega mo le vaavaaia lelei o i latou i aso uma talu ona faanofoesea.
O le aso a taeao, o le a faamautu mai ai suega a i latou uma o loo faanofoesea e le gata i le pasese ae faapea foi ma le aufaigaluega na muaau i le taunuu mai o le vaalele. O loo tālia foi le faamaoniga mai Niusila o a tatou suega na ave e iloa ai le ituaiga o le siama o le KOVITI19 ua aafia ai le 26 o o tatou tagata.
O le ala lea ua faaiugafonoina ai e le Kapeneta i le asō, le toe faaauauina o le tapunia atoa ole atunuu mo le isi 24 itula e afua atu i le itula e 6 i le afiafi o le Aso Tofi, 27 Ianuari 2022 seia aulia le 6 i le afiafi o le Aso Faraile, 28 Ianuari 2022. E faaauau pea ona tatala mai i le 8 i le taeao seia oo i le 2 i le aoauli a taeao – Aso Tofi, 27 Ianuari 2022, auaunaga ma aiaiga o le tatalaina o nei auaunaga, e pei ona muai faailoa atu i le atunuu.
Ua silasila foi le Kapeneta e toe faatulaga a tatou laasaga, mo le puipuiga o le atunuu mai lenei faamai (alert levels) ina ia saga faamautu aiaiga mo le lanu moli, p o o le laasaga lona 2, e faavae i le tulaga o le iai o i latou ua aafia i le faamai, a o loo malu i totonu o nofoaga o loo faanofoesea ai. E faapea foi i le lanu mumu po o le laasaga lona tolu e faavae i luga o le faamaonia ua mama i tua le faamai ma pepesi i le atunuu. E aofia ai foi i lenei faatulagaga le saga faamaoti o poloaiga e tuuina atu mo faalavelave faafuasei, atoa ai ma gaioiga faalesoifua maloloina ma le puipuiga lautele o le atunuu, e fitoitonu i ai.
O le a fofogaina le atunuu mo isi laasaga o le a agai i ai fuafuaga mo le agai atu i le faaiuga o le isi 24 itula ua faaopoopo nei mo le tapunia o le atunuu.
E faaauau pea le tulaga o le faailoa atu o faamatalaga i tulaga ua iai le faamai mai le tatou Malo e tauala atu i le Komiti o Faalavelave Faafuasei.
Le atunuu e, e ui ua i totonu o o tatou laufanua le faamai, o le talosaga a le tatou Malo, ia tumau pea lo tatou faatuatua, aua tatou te mafaia mea uma i le faatasi mai o lo tatou Atua. O puapuaga ma luitau o le soifuaga nei, tatou te feagai pea, peitai e le liliu le alofa tunoa o le Atua i a Samoa.
(0)
