Saunoaga mo le Tatalaina o le Maota Fono Fou o le Palemene

0
87

Aso Tofi 14 Mati 2019

Lau Susuga i le Taitai o le Sauniga, Rev Aisoli Iuli.
Afio lau Afioga, o le Ao Mamalu o le Malo ma le Masiofo
Afio le Sui Palemia ma Minisita o le Kapeneta
Afio lau Afioga i le Faamasino Sili ma le mamalu o le Faamasinoga
Afio lau Afioga i le Fofoga Fetalai ma Sui Usufono o le Palemene o Samoa
Le Aufaigaluega Paia a le Atua
Le maualuga o Samoa ua mafai ona tatou potopoto i lenei taeao
O le atoaga lea o ou paia faale-Malo, faale-aganuu ma le faa-Talalelei.
Afio le Sui Minisita o Atinae Faava-o-Malo ma le Pasefika o Ausetalia, Senator Hon. Anne Ruston ma le mamalu o le faigamalaga.

Ua paia Tiafau o le malae o le faautugatagi a Samoa aua o lea ua atoa le faga i Laua i ou paia faataotooto i le afua mai mauga tetele seia paia mauga-iti. O mamalu e le avea, a o paia foi e le toe tau tapu’eina.

Nuunuu atu ia i le fatuaiga tausi a Tulatoa ma Tootoouli ae a le Usoga a Tumua ma Puleono i la latou foi matafaioi faifai pea.

E ia te au le ava tele ou te faatalofa atu ai i le paia maualuga o lenei Sauniga Aloaia e faamanatu ai le isi laasaga maualuga o le Tala faasolopito o le Palemene o le Malo Tutoatasi o Samoa … “O le Tatalaina Aloaia o le Maota Fono Fou o le Palemene o le Malo o Samoa.”

E tusa ai ma faamaumauga a lo tatou Malo, na amata le galuega o le Uluai Maota Fono i le aso 21 Iulai 1916. O le Matai Tufuga, o le Susuga ia Solofuti Fili, ma lana Au tufuga mai le afioaga o Satoalepai, Savaii. Na maea le galuega i le aso 18 Aokuso i lea lava tausaga. E £30(pauni) le aofai o le tupe na tuuina atu e le Malo o Samoa e fai ma totogi o le galuega. E £10(pauni) faaopoopo na tuuina atu mo le toe talaina mai o le Fale Samoa utupoto tolu sa i ai i Vaimea ma fausia ai le fale fono i Mulinuu nei. O le isi £20(pauni) na foai faameaalofa e le Susuga Malietoa Tanumafili I, na fai ma Sui o le Kalapu e faaigoa o le S.T.K.K. O le uluai ata o le Fale sa ‘osi’osi i le vaitusi lanu moana.

“… o le Uluai Maota Fono lea o le Palemene o Samoa, ua faatulai mai. Peitai, o lea fale sa masani ona fai ma fale o pulega faa-kolone i le tele lava o itu taua, ma i le tele lava foi o mea na tutupu i totonu o lo tatou atunuu, o lea fale sa fai ma nofoaga tutotonu e tetee atu ai Samoa faasaga i pulega faamālō a tagata papalagi. E tele fonotaga ma faapotopotoga na usuia i inei talu mai le masina o Aokuso 1916. O le Fono a Faipule, ma le Fono Aoao Faitulafono sa faapea lava ona feiloai i lea lava fale. O iina foi sa feiloai ai le Komiti o Galuega o le 1953, i le ‘Fuafuaga Tau Atinae mo Samoa’. Na faapea foi ona usuia ai le fonotaga a le Komiti o Galuega na faatuina i le tausaga e 1954 ma le Fono Faavae o le 1954, e talanoa ai se faavae mautu o le Malo o Samoa. O le Maota lava foi lea, na galulue ai le Komiti o Galuega 1959 mo le faiga Malo e pulea e ia o ia lava, o lona uiga o le faigamalo Tutoatasi o Samoa ma le Fono Faavae o le 1960, i le tusiaina o le Faavae Tusitusia mo Samoa. I le 1962, na avea ai loa lea maota, ma Maota Aloaia o le tatou uluai Palemene o Samoa.”

 

Maota Fono – 1972

O le fausaga o le Maota Fono lona lua o le Palemene, lea na fausia ma tatalaina i le 1972, i le taimi lea o tulai mai le Afioga i le Palemia, Tupua Tamasese Lealofi IV, na aofia ai suiga i le uluai fausaga lapotopoto po o le ata tusia e faaofuofu, o le ata o le fale tele. Manatua foi e lua lava fale o Samoa, o le afolau ma le fale tele lapotopoto. O na suiga, sa avea ma faaailoilo i suiga uiga vaaia faatemokarasi a Samoa ma lona Palemene, ua faapena ona atagia ai o se tala fou i upufai o Malo, ma uunaia ai finauga fou i upufai o Malo, ae o lo o faapena foi ona atagia manino ai suiga o le vaaiga i upufai o le tatou Malo.

“O le tatala aloaia o le Malae Vaalele i Faleolo i le aso 21 Aperila 1972, ua o se mitamitaga lea na faagaeetia ai lagona o le Palemene. Na sosoo lena ma le tatalaga o le Maota Fono Fou o le Palemene i le aso 31 Me 1972, ma o se sauniga faapitoa i le agaga fiafia ma le loto faafetai.

O le talitonuga sa iai i lena taimi, e i ai foi se aso, o le a tatou solofa ai le tāua o le fausaga o lena foi Maota fou ina ua tuai ina ua au tausagā lona matua, o lona uiga tāua e tamau i le aganuu, o faafinauga i felafolafoaiga i tulaga faaupufai, ma faapena ona toe suia ai i se Maota Lona Tolu fou o le Palemene. O le fausaga o le Maota lona lua, na lē aofia ai suiga na faailoa ai le uiga fesuisuiai o le Faiga Faatemokarasi i Samoa ma lona Palemene, ma atagia ai o se vaaiga i se tala fou o finauga faaupufai o lo tatou Malo.”

I lo’u tulaga o le Palemia o Samoa e avea ai au ma Sui o Tagatanuu o Samoa, e momoli ai le tatou upu faafetai i le sao taua o le Malo o Ausetalia na fesoasoani malosi mai i le faatupeina o lenei galuega tele ma le taua mo Samoa. E pei ona silafia na malaga faapitoa mai le Kovana tamaitai o le Malo Ausetalia i le 2012, latou te faasilasila mai le latou fesoasoani ona o le tele o tausaga ua tutoatasi ai lo tatou Malo. E fesaosoani mai ai i le faatupeina o le galuega lenei. O lenei Maota o le a avea pea ma faailoga o le faiga paaga o se mafutaga faaumiumi mautu fealofani a Samoa ma le Malo o Ausetalia faatasi ai, o le tausaga nei e atoa iai le 42 tausaga o sootaga faava-o-Malo i le va o Samoa ma Ausetalia.

O le faaleleia o le tulaga i Pulega-Malo, o le faamuamua lea i lenei Faiga Paaga mo tulaga i Atinae. O le Maota Fono Fou lenei, o le a faamausali ai le faaleleia atili o le auai ma le faaaogaina e o tatou Tagata Samoa o taualumaga faa-Palemene faatasi ai ma le lagolago i Fuafuaga Mamao o Pulega Malo Lelei.

O le Maota Fou lenei ua fausia faapitoa i fausaga faaonaponei, e mausali ma talafeagai ma le faamoemoe na fausia ai ma ua mautinoa lona malosi e mafai ai ona ausia manaoga o fausaga o le Seneturi Lona 21 mo taualumaga faa-Palemene a Samoa.

O le ata o le Maota lenei o lo o atagia matilatila ai fausaga faale-aganuu a Samoa. O lo o tuufaatasia uma ai elemeni o fausaga o fale fono faa-Samoa e pei foi ona atagia i ona foliga i fafo lona atu pou lapotopoto faataamilomilo ua maea lalagaina lona ulu-pou i ‘afa Samoa moni. O lona falealuga i totonu ua fausia i le taatiaga o foliga o se tasi o fugalaau Samoa moni, o le Teuila. Ua avea nei ma fugalaau e faailo ai lo tatou Malo, po o fea lava le atunuu e te malaga i ai, a e a pipii loa le fugalaau lea i lou laei, ona iloa lautele ai lea. O le fugalaau lea e faailo ai Samoa I le lalolagi atoa.

O le Faailoga o le Pule (Mace) e pei ona tauaaoina aloaia mai i le taeao nei, o se tasi lea faataitaiga o le mafai ona tuufaatasi Vaega eseese o la tatou aganuu ma lona tala faasolopito e pei ona aofia ai o se Vaega o lenei galuega tele.

A o le Maota Fono Fou lava ia, e leai sona eseesega tele ma le Maota Fono Tuai. O le ata o lona ‘anofale ua tuufaatasia i foliga o le susulu malamalama o le malama faalenatura o le aso fou ma lagona fou. E pei foi ona silafia fesuiaiga ua faia e lo tatou Malo i le amataga o le oso a’e o le la ma le taamilosaga o le malamalama i le lalolagi atoa, e oso a’e le la i Samoa nei, o le uluai atunuu lea e susulu mai i ai le malamalama o le la, ona faatoa faasolosolo atu ai lea o le malamalama i Niu Sila, Ausetalia, Initia ma agai atu ai Isaraelu ma isi atunuu o le lalolagi, ae goto i Amerika Samoa, o le mea ua mafua ai nei ona taua tatou o Samoa i Sasae ae Samoa i Sisifo i latou e goto i ai le la. Ua faaaogaina ai faiga gafataulimaina faale-siosiomaga, auaunaga faainisinia talafeagai faatasi ma metotia tau fausaga mo faamoemoega ina ia mafai faatino lona tausiga ma ia aoga mo se taimi umi i le agai atu i le lumanai, lea ua atoa i ai i le tatou Fale Fono ua tulai mai nei.

E tatau pea ona ou faailoa nisi o Vaega o lo o fuafua le faamaeaina mo le atoatoa o lenei galuega tele, e aofia ai Nofoa mo Sui Usufono ma le Kapeta Faapitoa ua mamanuina i le Tagavai a le Atunuu e fia taoto i le ogatotonu-galemu o le Maota Fono Fou lenei, faapea ai foi ma se pa paipa lelei e tuu i le mea e omai ai taavale ona e fono po loa le Palemene, e omai nisi o faipule ua ese le tulaga fiafia ua oo i ai, i te’i ua patatu i lalo se taavale i autafa.

 

E tusa ai o le Ata Autu Tusia (Master Plan) o lenei Galuega, o lo o iai le fuafuaga mo le toe faaleleia atoa o le Faavae po o le Faataamilosaga atoa e aofia ai ma le Vaega o lo o faaaoga i lenei Sauniga ma le sitepu i luma atu.

 

E aofia ai foi ma le toe fausiaina o le Ofisa Fou mo le Ofisa o le Fono Aoao Faitulafono e faaaoga e le Aufaigaluega mo le tautuaina o le Palemene. E lagona ai foi le agaga faafetai i le Malo o Ausetalia, o lea foi ua toe aumai le latou folafolaga e fesoasoani i le faatupeina o lea galuega tele. E taua tele le teu o le va ma Malo nei e maua mai ai pea le agaga alofa e fesoasoani mai i lo tatou le tagolima. I le taimi nei, ua amata faagasolo le tusiaina o le ata o lena galuega.

 

O se avanoa foi ou te fia momoli ai le faamalo ma le faafetai ia i latou taitoatasi faapea nisi o Faalapotopotoga sa faamaite i lenei galuega.

E aofia ai le Afioga i le Fofoga Fetalai o le Paeaiga talu ai, Lona XV a le Palemene faapea le Failautusi o le Fono Aoao Faitulafono i lena vaitau i le taulagalaga i mea lelei, na afua ai le amataina o lenei Galuega Tele mai i le tausaga 2012.

E fia momoli foi le faamalo i le Faauluuluga ma le Aufaigaluega o le Konekarate a le Manteena mai Ausetalia, o i latou sa gafa ma le tusiaina o le Ata o le Maota Fono Fou aemaise o le taitaiga ma le vaaiga o lenei galuega tele ina ia taoto lelei i fuafuaga o lo o faataatia mai i ata.

E momoli foi le faamalo ma le faafetai I le Faauluuluga ma le Aufaigaluega o le Konekarate a le Craig Construction I Samoa nei mo le fausiaina o lenei Maota taua o le atunuu.

Sa filifilia lea konekarate i tauofoga faalauaitele a lo tatou Malo, e pei ona silafia, e tasi lea mea e faitio faitio ai le atunuu i lo tatou Malo i le tuuina atu (award) o konekarate i nisi. Na pau lava le mea e vaai i ai le tatou komiti o tauofoga ma le latou fautuaga e aumai i le Kapeneta, muamua, o le konekarate ua i ai galuega tetele ua latou faia, ua faamaonia foi ma pasia le lelei, ma le lua ia taugofie le latou galuega.

O faiga na o lo o taitaia ai lo tatou Malo. O le mea lea e tatau ona ou faamanino pea i taimi uma taimi uma, ona e i ai pea le masalosalo vale, ai o fai ma sē tau i ai nei konekarate.

E faatauofo, ona tuu lea ia i latou o le komiti faapitoa e i ai inisinia e matua maoae le tomai e matua auiliili atoa le tulaga o latou galuega sa fai muamua, pe na faapefea pe na lelei, toe silasila i le tau, pe talafeagai.

O mea lena lea na alai ona filifilia le konekarate lea latou te faatinoina le galuega. O se konekarate foi sa fai faatasi filifiliga ma Ausetalia.

O lenei galuega ua atagia manino ai le tulaga maoae o le tomai ma agavaa o nisi o tamalii ma fanau a Samoa i lea faatufugaga, ma o se tulaga tatou te viia ai le Atua Soifua i lona foai mai pea o le tomai ia tatou tama fanau e faatino ai nisi galuega tetele faapenei.

E fia momoli foi le faamalo ma le faafetai i le Afioga i le Fofoga Fetalai o lo o tu i le foe, Afioga ia LEAUPEPE Taimaaiono Toleafoa Faafisi faapea le Aufaigaluega a le Ofisa o le Fono Aoao Faitulafono, aemaise alii ma tamaitai Ofisa o lo tatou Malo faapea le Malo o Ausetalia i le galulue felagolagoma’i ma le feoeoea’i ina ia mautinoa le lelei faatino o lenei galuega ma ausia tulaga aupito sili ona manaomia e tusa o vaegatupe na faamaonia mo lona faatupeina.

E faamuli ma le ‘ai se faamalo ma se faafetai a le Malo i lo tatou atunuu i lo outou nofo tatalo. Faamalo tapuai, o lea ua tino mai lenei galuega o se tasi o Vaega o lou Tala Faasolopito. O fuafuaga alualu mamalo ia a lo tatou Malo aemaise le Vaega Faaupufai lenei e Puipuia Aia Tatau a Tagata mo le manuia auiluma o le atunuu lautele.

O le fesili mo tatou uma. O le a sa outou matau?

O lea se vaai atu i le maota nei e lauliliu ai tonu fai o le Malo male atunuu pele o Samoa nei ma le lumanai?

O se Maota ua lava tapena ona itu uma. E ao ai ona tatou ave le faafetai i le Atua na ia faamaite mea lelei ma faatupu manatu i lo tatou Malo, aemaise o ana paaga e lagolago mai i lo tatou vaivai.

O foliga na o Manū Faaifo mai Lagī mo se atunuu o lo o faalagolago ona taitai aemaise o lo o talosia e le aufaigaluega paia a le Atua, ma tuu atu pea i le Atua i taimi uma, o le faavae o le Malo o Samoa, ia to Manū mo Samoa . E le o ni foliga ia o se faigamalo o lo o faafoe e ni taitai e amio pa’a’ā, e faavasivasi, e piopio.

O le Malo o tagatanuu o samoa o lo o sasaa mai pea i ai e le Atua ana faamanuiaga.

Soifua.